Америкийн засаг захиргаа Дэлхийн эрүүл мэндийн байгууллагад татвараа төлөхөө зогсоох асуудлыг судалж үзэх болно гэж АНУ-ын Ерөнхийлөгч Дональд Трамп Цагаан ордонд хийлгэсэн хэвлэлийн бага хурлынхаа үеэр сэтгүүлчдэд мэдэгдсэн байна. Америкийн тэргүүн эхлээд АНУ цаашид Дэлхийн эрүүл мэндийн байгууллагыг санхүүжүүлэхээ зогсоож байна гэж шууд хэлээд “ДЭМБ Америкаас их хэмжээний хөрөнгө санхүүжилт авч байгаа. Одоо бид ДЭМБ-д зориулж үрж байгаа мөнгөө зогсооно” гэжээ.
Харин хэдхэн минутын дараа Д.Трамп энэ шийдвэрээ яг одооноос хэрэгжүүлэх үү гэсэн асуултын хариуд “үгүй ч байж болно” гэж хариулсан байна. “Би үүнийг хийнэ гэж яриагүй, гэхдээ бид ийм боломжийг судалж үзнэ” гэж Цагаан ордны тэргүүн хэлсэн байна. Та үүний өмнө бас ДЭМБ-д хөрөнгө оруулахаа зогсооно гэсэн шүү дээ хэмээсэн сэтгүүлчийн үгний хариуд Ерөнхийлөгч “Үгүй, би тэгээгүй, харин судалж үзнэ, санхүүжилтээ зогсоох асуудлыг судална гэсэн” хэмээжээ.
Д.Трамп бас “АНУ Дэлхийн эрүүл мэндийн байгууллагад их мөнгө өгч байгаа. Харин энэ байгууллага бидэнтэй зөвшилцөхгүй, АНУ-д төлөөлөгчдийг нь зорчихыг хориглосон миний шийдвэрийг шүүмжилж суудаг, ер нь олон зүйл дээр алддаг” хэмээн мэдэгдсэн байна.
Д.Трампын үгийг ДЭМБ тайлбарлалаа

 Тус байгууллагад өгдөг татвараа зогсоож магадгүй гэсэн АНУ-ын Ерөнхийлөгчийн мэдэгдлийг Дэлхийн эрүүл мэндийн байгууллагын Европын салбарын захирал Ханс Клюге тайлбарлаж “Дэлхийн эрүүл мэндийн байгууллагын 53 гишүүн орныг хариуцсан бүс нутгийн захирлын хувьд би танд, үгүй гэж хэлье. Бид өнөөг хүртэл энэ цар тахлын халуун шугаман дээр байна” гэж хэлснийг РИА Новости агентлаг дамжуулжээ. Х.Клюге мөн “Одоо бол санхүүжилтээ зогсоох тухай ярьж байх цаг биш” гэсэн байна.

эх сурвалж :"Ардчилал таймс сонин"