Хоорондоо байлдаж байгаа Йемений Засгийн газар, хуситуудыг урьдчилсан ямар ч нөхцөлгүйгээр хэлэлцээрийн ширээнд суухыг НҮБ-ын Ерөнхий нарийн бичгийн дарга Антониу Гутерриш уриаллаа. Үүний өмнө Саудын Араб тэргүүтэй Арабын эвсэл пүрэв гаргийн 12.00 цагаас эхлэн хоёр долоо хоногийн хугацаатай гал зогсоохоо лхагва гарагт зарласан. “Йеменд нэг талаас гал зогсоохоо мэдэгдсэн Саудын Арабт, эвслийн хүчинд талархал илэрхийлье. Энэ бол энх тайван тогтооход болон COVID-19-ийн халдварын тархалттай улс орнууд тэмцэхэд тус болно” гэж А.Гутерриш мэдэгдэлдээ дурджээ.
“Одоо би Йемений Засгийн газар, “Ансар Алла” хүчнийг өөрийн үүргээ биелүүлж нэн даруй гал зогсоохыг уриалж байна. Цаашлаад Засгийн газар болон хуситууд бие биеэ хүндэтгэн ямар ч урьдчилсан болзолгүйгээр миний тусгай төлөөлөгч Мартин Гриффитсийн зуучлалаар хэлэлцээр хийхийг уриалж байна” гэж Ерөнхий нарийн бичгийн дарга тэмдэглэсэн байна. Түүнийхээр зөвхөн яриа хэлэлцээрийн замаар л талууд нийт үндэстний хэмжээнд гал зогсоох асуудлаар тохиролцож чадна гэнэ.
Йемений Засгийн газар, шийтийн “Ансар Алла” хөдөлгөөний босогч хуситуудын хоорондох цэрэг улс төрийн сөргөлдөөн 2014 оноос хойш үргэлжилж байгаа. Саудын Араб тэргүүтэй Арабын орнуудын эвсэл 2015 оны гуравдугаар сараас хойш Йемений Засгийн газрын талд нэгдсэн. 2018 оны арванхоёрдугаар сард сөргөлдөгч талууд анх удаагаа НҮБ-ын санаачилгаар Стокгольмд хэлэлцээрийн ширээнд суусан. Уг хэлэлцээрээр Улаан тэнгисийн эрэг дээрх боомт Ходейдед гал зогсоож НҮБ-ын хяналтад өгөх, олзлогдогсодоо солилцох зэрэг хэд хэдэн чухал асуудлаар тохиролцож байв.

эх сурвалж :"Ардчилал таймс сонин"