Өмнөд Солонгост дөрөвдүгээр сарын 15-нд явуулахаар товлосон парламентын ээлжит бус сонгуулиа дөрөвдүгээр сарын 10-нд эхлүүлж улс орон даяар 3.5 мянга гаруй санал хураах байраа нээснээ Сонгуулийн төв комисс нь мэдээлжээ.
Коронавирусийн халдвар тархаад байгаатай холбогдуулан санал өгөхөөр ирсэн иргэд өөр хоорондоо нэг метрийн зайтай дугаарлах болон хүн бүр амны хаалт, бээлий өмссөн байхыг шаардаж байгаа. Мөн санал хураах байранд ороход сонгогчдын халууныг хэмжиж байна. Харин өвчтэй хүмүүсийг тусгайлан зассан байранд саналыг нь авах юм байна. Энэ жил сонгогчдын ирц өмнөх жилүүдийг бодвол харьцангуй сайн байж эхний өдрийн үд гэхэд нийт сонгогчдын долоо орчим хувь нь санал өглөө хэмээн Сонгуулийн төв комисс мэдээлжээ. Энэ удаа Солонгосын Үндэсний хурлын нийт 300 гишүүний 253-ыг нь нийтийн санал хураалтын дүнд сонгох бол 47 гишүүнийг нь намын жагсаалтаар оруулна.
Солонгосын Үндэсний хуралд нэр дэвшигчид 15 сая вон буюу 14 мянган ам.долларын татвар төлдөг байна.

Умард Солонгосоос дүрвэн ирсэн дипломат сонгуульд нэр дэвшжээ

 Умард солонгосын дипломат байгаад Өмнөд Солонгост зугтаж ирсэн Тэ Ен Хо Солонгосын Үндэсний хурлын сонгуульд сөрөг хүчний “Чөлөөт Солонгос” намаас нэр дэвшин өрсөлдөж байна гэж өмнөд солонгосын хэвлэлүүд мэдээллээ. Нийслэл Сөүлийн Каннам районд нэр дэвшин өрсөлдөж байгаа БНАСАУ-д дипломат ажил алба хашиж байгаад ирсэн Тэ Ен Хо хэрвээ сонгуульд ялбал Умард Солонгосоос зугтан ирээд Өмнөд Солонгосын хууль тогтоох байгууллага парламентад сонгогдсон умардын анхны зугтан ирэгч, төрийн албан хаагч болно.
Үүний өмнө Өмнөд Солонгосын парламентын гишүүнээр умардаас зугтаж ирсэн академич Чхве Мен Чоль сонгогдож байсан ч тэр нь Умард Солонгосын төрийн албан хаагч байгаагүй эрдэмтэн л байсан гэж хэвлэлүүд онцолжээ. Харин Тэ Ен Хо бол БНАСАУ-аас Их Британид суугаа Элчин сайдын яамны зөвлөх байсан юм байна. Тэрээр 2016 оны наймдугаар сард Өмнөд Солонгост зугтан ирсэн.
Сүүлийн 20 жилд БНАСАУ-ын 33 орчим мянган иргэн зугтаж Өмнөд Солонгост ирснээс төрийн өндөр албаны хүн нь энэ Тэ Ен Хо юм байна.

эх сурвалж :"Ардчилал таймс сонин"