Прагад байсан Зөвлөлтийн маршал Иван Коневын хөшөөг буулгасан нь олон улсын болон Орос, Чехийн хоорондох гэрээг зөрчөөгүй хэмээн Чехийн Гадаад хэргийн яамын төлөөлөгч Зузана Штихова сэтгүүлчдэд мэдэгдсэн байна. Оросын Батлан хамгаалахын сайд Сергей Шойгу Чехийн Батлан хамгаалахын сайд Лубомир Метнаруд хандаж маршал И.Коневын хөшөөг Моосквад шилжүүлж өгөхийг хүсч Оросын тал үүнтэй холбогдох зардлыг төлнө хэмээн захидал бичсэн. С.Шойгу захидалдаа Зөвлөлтийн маршалын хөшөөг Эх орны дайны ялалтын 75 жилийн ойн өмнө буулгасанд харамсч байгаагаа бас илэрхийлжээ.
Чехийн Батлан хамгаалахын төлөөлөгч үүнд хариулж “Хөшөөг буулгасан нь Орос, Чехийн хоорондох олон улсын нэг ч гэрээ хэлэлцээрийг зөрчөөгүй. Шинэ Оросын ямар хуульд хамааралтайг бид мэдэхгүй болохоор энэ талаар тодорхой тайлбарлаж чадахгүй байна. Ойрын үед манай хуульчид үүнийг судалж үзнэ” гэж З.Штихова тайлбарлажээ.
Чехийн эрх баригчид нийслэл Прагийн зургадугаар дүүрэгт байсан Зөвлөлт холбоот улсын маршал Иван Коневын хөшөөг өнгөрөгч баасан гарагт буулгасан. Хөшөөг буулгагчдын нэг 36 настай Онджей Коларж үүнийг ХХ зууны түүхийн музейд шилжүүлнэ гэсэн байна. Зөвлөлтийн маршал Иван Коневыг Варшавын гэрээний цэргийг командалж 1968 онд Чехэд гарсан эсэргүүцлийн хөдөлгөөнийг цэргийн хүчээр дарж энгийн номхон олон хүний аминд хүрч, Чехийг Зөвлөлтийн мэдэлд хэвээр үлдээсэн хэмээн буруутгадаг. Прага ОХУ-ын Батлан хамгаалахын сайдын саналд буулгасан хөшөөг Москвад эргүүлэн өгөхгүй гэсэн хариу өгчээ.

эх сурвалж :"Ардчилал таймс сонин"