Шинэ төрлийн коронавирусийн халдварын тархалтыг дэлхий дахин зогсоож бүрэн ялах болоогүй, хүйтэрч эхлэхэд байдал дахиад муудна гэж Хятадын Шанхай хотын мэргэжилтнүүд хэлээд энэ халдварын хоёр дахь давлагаа арваннэгдүгээр сард тохионо гэж байна. Шанхай хотын халдварт өвчин судлалын шинжээчдийн бүлгийн удирдагч Жан Вэньхун ингэж хэлснийг Sina хэвлэл мэдээлжээ. Түүний хэлснээр COVID-19 бага температурт илүү их тэвчээртэй учраас өвөл болохоор улам хурдан тархах магадлалтай гэнэ. Гэхдээ намраас эхлэх халдварын хоёр дахь тархалт нь өнөөгийнх шиг тийм эрчимтэй биш байх гэж Жан Вэньхун хэлжээ. Гагцхүү Африк болон Өмнөд Америкийн эрүүл мэндийн тогтолцоо султай, өвчлөлтэй тэмцэх хангалттай нөөцгүй орнуудад л хүндрэл учрах байх гэсэн байна.
Энэ мэргэжилтэн гуравдугаар сарын сүүлээр People’s Daily хэвлэлд ярилцлага өгөхдөө коронавирусийн халдварын дэлхий дахины тархалтыг зургадугаар сар гэхэд гайгүй болно, гэхдээ энэ өвчнийг энэ ондоо багтаж бүрэн ялж чадахгүй гэж мэдэгдэж байсан.
Өнгөрсөн оны сүүлээс хятадын Ухань хотоос эхлэн тархсан вирус мутацид орж Европт илүү аюултай хэлбэрээр тархаж магадгүй юм, гэхдээ энэ талаар хэлэхэд арай эрт байна. Вирусийн бүтцийн өөрчлөлтийг батлахын тулд маш нарийн судалгаа хэрэгтэй гэж Жан Вэньхун хэлсэн байдаг. Жонс Хопкинсын их сургуулийн мэдээлснээр коронавирусийн халдвараар дэлхий дахинаа өнөөдрийн байдлаар хоёр сая гаруй хүн өвчилж 119.4 мянган хүн нас барж 434.7 мянган хүн эдгэрч гараад байгаа юм.

эх сурвалж :"Ардчилал таймс сонин"