Оросын хүнсний бүтээгдэхүүн үйлдвэрлэгч, нийлүүлэгчид өнөөдөр хүн амд хүнсний бүтээгдэхүүний карт нэвтрүүлэхийг эрх баригчдад хандан уриаллаа гэж РИА Новости агентлаг мэдээлжээ. Засгийн газарт хандаж ийм санаачилга гаргагчид бага орлоготой хүмүүст зориулан зайлшгүй хэрэгцээт хүнсний бараа бүтээгдэхүүний карт гаргаад цаашдаа коронавирусийн халдварын тархалтаас болоод орлогогүй болж байгаа иргэдийг ч бас хамруулж болно гэсэн байна. Тэднийхээр бол ийм иргэдэд сар бүр 10 мянган рублийн, гэхдээ эх орны үйлдвэрийн бараа бүтээгдэхүүн авч байх карт олгох гэнэ. Ингэж хүнсний карт гаргах нь зөвхөн бага орлоготой иргэдийг дэмжих төдийгүй, коронавирусийн халдварын улмаас эрэлт буурч байгааг зогсоож, үндэсний үйлдвэрлэгчдийг дэмжих, ажлын байр хадгалахад сайн талтай гэсэн байна. Энэ санаачилгад Оросын Махны үндэсний нийгэмлэгийн тэргүүн Сергей Юшин, Чихрийн холбооны ерөнхийлөгч Юрий Кацнельсон, Сүү үйлдвэрлэгчдийн үндэсний холбооны удирдагч Артем Белов болон бусад мэргэжлийн холбоодын удирдлагууд гарын үсэг зуржээ. 

эх сурвалж :"Ардчилал таймс сонин"