Казахстан улсад өнгөрсөн ням гарагт болсон Ерөнхийлөгчийн сонгуульд өнөөдөр үүрэг гүйцэтгэж байгаа төрийн тэргүүн Касым-Жомарт Токаев тэргүүлж байна. Түүнийг ялуулах бүхий л нөхцөлийг К.Токаевт ажлаа хүлээлгэн өгсөн Нурсултан Назарбаев хангаж өгсөн гэж Оросын улс төр судлаач, Тусгаар улсуудын хамтын нийгэмлэг хариуцсан шинжээч Аркадий Дубнов үзэж байна. Өнөөдөр ч Казахстаны засаглал Нурсултан Назарбаевын гарт байгаа гэж А.Дубнов хэлж байгаа юм.
Нурсултан Назарбаев өнгөрсөн гуравдугаар сард хугацаанаасаа өмнө бараг бүтэн 30 жил эдэлсэн бүрэн эрхээсээ татгалзаж, парламентын дээд танхимын Сенатын спикер Касым-Жомарт Токаевыг орондоо томилсон юм.

Ням гарагт болсон сонгуулийн саналын 77.4 хувийг тоолоход Касым-Жомарт Токаев нийт сонгогчдын 70.13 хувийн санал авч нэр дэвшигчдийг тэргүүлж байна гэж “Олон нийтийн санал бодол” хүрээлэнгийн зөвлөлийн тэргүүн Айнур Мажатова мэдэгджээ. Түүний араас нэр дэвшигч Амиржан Косанов 15.39, гуравдугаарт “Ак Жол” намаас нэр дэвшсэн Дания Еспаева 5.32, коммунист Жамбыл Ахметбеков 3.86 хувийн санал аваад байгаа юм байна. Казахстаны Ерөнхийлөгчийн ээлжит бус сонгуульд долоон хүн өрсөлдөж байгаа юм.
Сонгуулийн өдөр нийслэл Нур Султан, Алма-Ата хотуудад олон нийтийн эсэргүүцлийн жагсаал цуглаан болж замын хөдөлгөөн хааж хууль сахиулагчдын өөдөөс чулуу, мод шидлэн, чинжүүтэй хий хэрэглэжээ. Цагдаагийнхан энэ хоёр хотод нийт 500 орчим хүнийг баривчлан саатуулсан гэж Казахстаны Дотоод хэргийн сайдын орлогч Марат Кожаев мэдээлжээ.