Оросын төрийн “Орос дахь ажил” сайтад ганцхан долоо хоногт 180 мянган хүн ажилгүй болсон тухайгаа мэдэгдсэн өргөдөл ирүүллээ гэж ОХУ-ын Хөдөлмөр, нийгмийн хамгааллын сайд Антон Котяков Ерөнхийлөгч Владимир Путины оролцсон Засгийн газрын танхимын хуралдаан дээр мэдэгдсэнийг РБК телевиз шууд дамжуулжээ. “Бид ажилгүйчүүдийг бүртгэх зайны шинэ журам нэвтрүүлээд байна. Тэгэхэд ганц долоо хоногийн дотор л манай иргэдийн зүгээс 180 мянган өргөдөл ирүүллээ” гэж А.Котяков хэлсэн байна. Ингэж өргөдөл өгөх нь нааш цааш явж хорио цээрийн дэглэм зөрчихгүй, иргэд манай “Орос дахь ажил” сайтад байгаа маягтыг л бөглөхөд хангалттай гэж сайд онцолжээ.
Энэ оны эхнээс Орос дахь ажилгүйчүүдийн тоо 44 мянгаар нэмэгдэж өнөөдрийн байдлаар 735 мянган хүн ажилгүй гэж бүртгүүлээд байна гэж А.Котяков бас онцолсон байна. Сайдын хэлснээр ажилгүйдлийн тэтгэмжийг найман мянган рублиэр нэмэгдсэн гэжээ. Оросын иргэд гуравдугаар сарын 1-нээс хойш л ажлаа алдах нь ихэссэн, ойрын гурван сар, дөрөв, тав, зургадугаар сард дээд хэмжээндээ хүрч магадгүй гэж А.Котяков онцлов. Ажилгүйчүүдийн алсын зайнаас бүртгэх шинэ журам энэ дөрөвдүгээр сарын 9-нөөс эхлэн хэрэгжиж эхэлсэн.
Үүний өмнө ОХУ-ын Тооцооны танхимын дарга Алексей Кудрин коронавирусийн дэгдэлтийн үеэр тогтоосон хязгаарлалтын дэглэмээс болоод Орос дахь ажилгүйчүүдийн тоо хэд дахин нэмэгдэж энэ оны эцэс гэхэд найман саяд хүрч магадгүй гэж мэдэгдэж байсан. Тэрээр коронавирусийн үеэр авч хэрэгжүүлж байгаа хорио цээрийн дэглэм нь зоогийн газар, зочид буудлын үйлчилгээ, зугаа цэнгээн, спортын арга хэмжээнүүдэд сөргөөр нөлөөлж байна гэжээ.

эх сурвалж :"Ардчилал таймс сонин"