Коронавирусийн халдварын дэгдэлт олон улс орныг хамраад байгаа энэ үед дэлхий даяар гал зогсоох санаачилга гаргаж байгааг минь ОХУ-ын Ерөнхийлөгч Владимир Путин дэмжинэ гэдэгт найдаж байгаагаа Францын Ерөнхийлөгч Эммануэль Макрон илэрхийлснийг ТАСС агентлаг дамжуулжээ. “Би ийм санаачилга гаргах тухайгаа эхлээд В.Путинтэй ярилцсан. Түүнээс хойш бусад удирдагч энэ талаар хатуу итгэл үнэмшилтэй байгааг хүлээн авсан, гэхдээ би тэдэнтэй ярилцаагүй. Одоо би үүнийгээ ойрын хэдэн цагийн хугацаанд хэрэгжүүлнэ гэж найдаж байна” хэмээн Э.Макрон RFI радио станцад ярилцлага өгөх үеэрээ мэдэгдсэн байна.
Түүний энэ санаачилгыг БНХАУ-ын дарга Си Зиньпин, АНУ-ын Ерөнхийлөгч Дональд Трамп, Их Британийн Ерөнхий сайд Борис Жонсон нар хэдийнээ дэмжсэн гэж Францын ерөнхийлөгч тэмдэглэжээ. Дөрөвдүгээр сарын 14-нд Евроазийн эдийн засгийн хамтын ажиллагааны байгууллагын орнуудын тэргүүнүүд бас харилцан итгэлцлээ бэхжүүлж, зэвсэгт мөргөлдөөн худалдааны дайнаа зогсоон нэг талаас тавьсан эдийн засгийн хоригоо цуцлахыг дэлхийн бүх улсуудад уриалсан. Үүнээс хэдхэн цагийн дараа НҮБ-ын Ерөнхий нарийн бичгийн дарга Антониу Гутерриш ч энэ санаачилгыг дэмжиж байгаагаа илэрхийлээд зэвсэгт мөргөлдөөн болж байгаа Афганистан, Камерун, Төв Африкийн бүгд найрамдах улс, Колумб, Ливи, Мьянмар, Филиппин, Өмнөд Судан, Судан, Сири, Украин, Йемен улсуудыг энэ уриалгыг хүлээн авч дэмжин байлдааны ажиллагаагаа зогсоохыг уриалсан байна. Уриалгыг Украин, Палестин, Афганистан, Тайланд, Филиппин, Йемен, Судан, Камерун, Шри-Ланка улсууд нааштай хүлээж авч байгаагаа мэдэгджээ.

эх сурвалж :"Ардчилал таймс сонин"