Умард Солонгосын удирдагчаас захидал хүлээн авсан гэж Америкийн тэргүүн Дональд Трамп мэдэгдсэний хариуд БНАСАУ-ын Гадаад хэргийн сайд Ли Сон Гвон удирдагч Ким Чен Ун АНУ-ын Ерөнхийлөгчид ямар ч захидал илгээгээгүй хэмээн мэдэгдсэнийг Хойд Солонгосын мэдээллийн төв агентлаг ЦТАК дамжуулжээ. “Манай удирдагч АНУ-ын Ерөнхийлөгчид ямар ч захидал илгээгээгүй, Америкийн тэргүүн өмнө явуулж байсан илгээлтийг дурссан байж мэдэх юм” гэж БНАСАУ-ын Гадаад хэргийн сайд мэдэгдсэн байна. Дональд Трамп өнгөрсөн бямба гарагт Цагаан ордонд хийлгэсэн хэвлэлийн мэдээллийнхээ үеэр Ким Чен Унаас “сайхан захидал” хүлээн авсан гэж мэдэгдээд БНАСАУ-ын удирдагчтай маш сайхан харилцаатай гэсэн юм.
АНУ, БНАСАУ-ын удирдагчдын дээд хэмжээний уулзалт анх 2018 оны зургадугаар сард Сингапурт болж хамтарсан баримт бичиг гаргасан. Тэгэхэд Пеньян Солонгосын хойгийг цөмийн зэвсэггүй болгох үүрэг хүлээсэн бол АНУ хариуд нь аюулгүй байдлын баталгаа өгсөн. Хоёр дахь уулзалт 2019 оны хоёрдугаар сард Вьетнамын нийслэл Ханойд болж Д.Трамп, Ким Чен Ун хоёр ганцаарчлан ярилцсан ч ямар нэг баримт бичигт гарын үсэг зуралгүй амжилтгүй тарсан. Тэд хоёр гурав дахь удаагаа БНАСАУ, ӨБНСУ-ын хоорондох цэрэггүй бүсэд уулзсан юм. Өнгөрөгч оны аравдугаар сард АНУ, БНАСАУ-ын төлөөлөгчид Шведэд уулзсан ч уг зөвлөлдөх уулзалт мөн л амжилтгүй тарсан юм. БНАСАУ-ын төлөөлөгчдйин тэргүүн Ким Мён Гиль хэлэлцээр тасалдсаныг зарлаад Америкийн төлөөлөгчдийг өөрийнхөө байр суурийг эргэн харах хэрэгтэй гэсэн. Харин АНУ-ын Төрийн департамент уулзалт ажил хэрэгч болсон гэж мэдээлж байв.

эх сурвалж :"Ардчилал таймс сонин"