Тайландын аялал жуулчлал, амралтын Краби мужид агуйд амьдарч байсан орос хосуудыг цагдаагийнхан олж илрүүллээ гэж Chiang Rai Times хэвлэл өнгөрсөн даваа гарагт мэдээлсэн байна. Оросын хос хоёр сарын өмнө Тайландад амрахаар ирсэн ч коронавирусийн тархалтаас болоод хил хааснаар эх орондоо буцаж чадаагүй байна. Гэтэл гуравдугаар сард тэднийг үл таних этгээд дээрэмдэж дрон, дүрс бичлэгийн камер, хувийн бусад эд зүйлийг нь авч одсон гэнэ. Гэтэл дөрөвдүгээр сар гараад зочид буудал нь хаагдах болж тэднийг гудамжинд гаргажээ. Оросууд хүний нутагт хандах хүн, байгууллагагүй болж асуудлыг өөрсдөө шийдэхээр Тонсаины булан дахь агуйд майхан барин амьдрах болсон гэнэ. Цагдаагийнхан хос хоёрын эрүүл мэндийг нь үзүүлэхээр эмнэлэгт хүргэж коронавирусийн шинжилгээ авахад халдваргүй гарснаар эх орондоо буцаж чадахгүй Краби мужид хоригдсон гадаад иргэдийн байгаа зочид буудалд оруулжээ. 

эх сурвалж :"Ардчилал таймс сонин"