Италийн иргэдийн бараг тал болох 47.3 хувь нь улсаа евро бүсээс гарахыг дэмжиж байна гэсэн судалгааны дүнг Termometro Politico хэвлэл энэ сарын 22-ны лхагва гарагт дамжуулжээ. Харин Европын холбооноос Итали гарах ёстой гэж үзэж байгаа иргэдийн хувь 46.1 байсан бол үүний эсрэг 49 хувь нь санал өгсөн байна. Коронавирусийн халдвар асар хурдан тархаж байхад Европын холбоо, тус холбооны орнууд Италид тусалж дэмжихээс шууд татгалзсанаас үүдээд “Европын эсрэг” үзэл ийнхүү өссөн байна.
Европын холбооны гишүүн орнуудын Сангийн сайд нар коронавирусийн тархалт, хөл хорионоос болж гарсан эдийн засгийн уршгийг арилгах зорилгоор Евробонд гаргая гэсэн Итали болон бусад орны саналыг хүлээн аваагүй юм. Харин сангийн сайдууд энэ халдварын эдийн засгийн үр дагаврыг арилгахад зориулж 540 тэрбум евро гаргахаар болсон нь зээлийн хэлбэртэй юм. Италийн сөрөг хүчнийхэн ийм тусламжийг авах нь улс орноо “Грекийн замаар оруулах” хэрэг хэмээн шүүмжилж байна. Италид коронавирусийн халдвараар 25 мянга гаруй хүн нас бараад буй.
Гуравдугаар сарын 22-нд Италийн Ерөнхий сайд Жузеппе Конте улсынхаа бүх албан байгууллага, эмийн сан, хүнснээс бусад бүх худалдаа үйлчилгээний байгууллагуудыг хаах шийдвэр гаргасан. Дөрөвдүгээр сарын дундуураас зарим бүс нутагт номын болон хүүхдэд зориулсан бараа худалдаалдаг дэлгүүрүүдийг нээгээд байгаа. Нийт долоон сая гаруй ажил хийдэг хүнийг хөл хорионд оруулж аж ахуйн нэгжүүдийн талынх нь үйл ажиллагааг зогсоосон. Энэ хориг, хөл хориог тавдугаар сарын 4-нөөс л зөөллөж магадгүй байгаа ч бүх бүс нутагт зэрэг хэрэгжүүлэхгүй гэнэ. Эдийн засаг, ард иргэдээ дэмжихээр Италийн Засгийн газар эхний ээлжинд 25 тэрбум, дараа нь дахиад 50 тэрбум евро гаргахаар болжээ.

эх сурвалж :"Ардчилал таймс сонин"