Дэлхий дахинд их хэмжээний өлсгөлөн нүүрлэж магадгүй байна гэж НҮБ-ын Хүнсний хөтөлбөрийн гүйцэтгэх захирал Дэвид Бизли Аюулгүйн зөвлөлийн өргөтгөсөн хуралдаан дээр мэдэгдсэнийг ТАСС агентлаг мэдээллээ. Түүнийхээр шинэ төрлийн коронавирусийн халдварын тархалт цар тахлын хэмжээнд хүрснээс болоод хүн төрөлхтөн ойрын хэдэн сарын дараа хүнсний ноцтой дутагдалд орохоор байна гэнэ. Энэхүү нөхцөл байдлаас зайлсхийхийн тулд улс орнууд хүнсний аюулгүйн байдлаа хангах арга хэмжээ авч эхлэхийг Д.Бизли уриалсан байна. “COVID-19-ийн энэ тархалт хүн төрөлхтөнд зөвхөн эрүүл мэндийн аюул учруулаад зогсохгүй бас дэлхийг хамарсан хүмүүнлэгийн аюул учруулах нь гэдгийг би тэмдэглэхийг хүсч байна. Зэвсэгт мөргөлдөөн болж байгаа бүсэд амьдарч байгаа сая сая хүн, ялангуяа хүүхэд эмэгтэйчүүд өлсгөлөнгийн ирмэгт байна” гэж тэр онцолжээ.
Одоохондоо дэлхий дахиныг хамарсан өлсгөлөн хараахан байхгүй байгаа ч 821 сая хүнд хүнс дутагдалтай хэвээр байна. Өөр бас 265 сая хүн энэ онд хүмүүнлэгийн асуудалтай тулгарч мэдэхээр байна. Хүнсний хомсдол, өлсгөлөн нүүрлэх аюул зэвсэгт мөргөлдөөн болж байгаа 30 улс оронд тулгарч, нөхцөл байдал улам муудсаар байна гэж Д.Бизли тэмдэглэжээ.

эх сурвалж :"Ардчилал таймс сонин"