Украины Ерөнхийлөгч Владимир Зеленский төрийн тэргүүний бүрэн эрхийнхээ хугацааг дуусгахаас өмнө Донбасс дахь зэвсэгт мөргөлдөөнийг эцэс болгоно гэдэгтээ итгэлтэй байна. “Миний бүрэн эрхийн хугацаанд энэ дайн дуусна гэдэгт итгэлтэй байна. Би өөрөө итгэж байна. Нэг жил хүлээчих, нэг жил ажиллаадахъя гэж би хэлж байсан даа. Хэрвээ Минскийн хэлэлцээр ажиллахгүй юм бол бид тактикаа өөрчлөх болно” гэж В.Зеленский “Украина-24” телевизээр дамжуулсан “Ерөнхийлөгч В.Зеленскийн нэг жил” баримтат кинондоо хэлсэн байна. Тэр бас Донбассын сөргөлдөөнийг зохицуулах ажлын хэсэг долоо хоног бүр видео хурал хийж байгаа, Украины тал ч эндээс амжилт гаргахыг эрмэлзэж байна гэжээ. “Энэ үйл явцыг бид аль болох хурдлуулж, амжилтад хүрнэ. Минскийн уулзалт бүрийн дараа ямар нэг зүйлээр тохиролцож, алхам урагшилсан цаас үлдэж байх ёстой” гэж В.Зеленский онцолсон байна. Украины засаг захиргаа 2014 оны дөрөвдүгээр сараас өөрийгөө Луганскийн болон Донецкийн бүгд найрамдах улс хэмээн тунхагласан хоёр бүсийн эсрэг цэргийн ажиллагаа эхлүүлсэн. НҮБ-ын хамгийн сүүлд тооцоолсноор энэ мөргөлдөөний уршгаар 13 орчим мянган хүний амь үрэгдээд байгаа. Донбассын нөхцөл байдлыг тогтворжуулах талаарх ажлын хэсэг Беларуссын нийслэл Минск хотод 2014 оны есдүгээр сард гал зогсоох асуудлаар гурван ч баримт бичиг гаргасан ч талууд үүнийг мөрдөлгүй буудалцсаар байна.

эх сурвалж :"Ардчилал таймс сонин"