Оросын Тюмень мужийн 18 настай залууг нэгэн сургууль руу зэвсэгт халдлага үйлдэхээр бэлтгэж байсан хэмээн сэжиглэж Холбооны аюулгүйн албаны ажилтнууд саатууллаа гэж Мөрдөн байцаах хорооны орон нутгийн удирдах газар албан сайтдаа энэ сарын 22-нд мэдээлжээ. Залууд эрүүгийн хуулийн “Хоёр болон түүнээс дээш хүнийг аюултай аргаар хөнөөхөөр зэхэж байсан” гэсэн зүйл ангиар хэрэг үүсгэн шалгаж байгаа юм байна. Мөрдөн байцаах ажиллагааны явцад тэр залуу энэ халдлагаа дөрөвдүгээр сард багтан үйлдэхээр галт зэвсэг хадгалан, гар хийцийн бөмбөг бэлтгэж гэртээ хадгалж байжээ. “Ганцхан нөхцөл байдлаас болоод гэмт этгээд санаагаа хэрэгжүүлж амжилгүй, хууль сахиулах байгууллагын ажилтнууд энэ үйлдлийг нь гарахаас өмнө тасалдуулж чадлаа” гэж мэдээлэлд дурджээ. Мөрдөн байцаах албаны сайтад түүнийг саатуулж байгаа дүрс бичлэгийг нийтэлсэн байна. Хууль сахиулагчид нэгжлэгийн үеэр гар хийцийн тэсрэх бодис, ангийн буу, сумны хамт, ангийн хоёр хутга, холбооны хэрэгсэл хураан авсан байна. Саатуулагдсан этгээд эхний байцаалтаар ийм халдлага үйлдэх гэж байснаа хууль сахиулагчдад мэдүүлжээ.