Ливийн үндэсний армийн командлагч фельдмаршал Халиф Хафтар Үндэсний зөвшилцлийн Засгийн газар байгуулсан Схиратын хэлэлцээрийг хүчингүй болгож байгаагаа мэдэгдээд өөрийгөө төрийн тэргүүнээр томилсноо зарласан байна. “Улс орны удирдлагыг Зэвсэгт хүчний ерөнхий командлал өөртөө авч байна. Энэ нь хэдийгээр хүнд, хариуцлагатай ачаа гэлээ ч бид ард түмнийхээ хүсэл шаардлагыг хүлээн авч байна” гэж Х.Хафтар ард түмэндээ хандсан дүрс бичлэгэн илгээлтийнхээ үеэр тэмдэглэснийг ТАСС агентлаг дамжууллаа. Фельдмаршал бас Ливийн үндэсний арми иргэний төрийн байгууллагууд байгуулахаа амлажээ. “Хүмүүс өөрийнхөө хувь заяаны эзэн байж, өөрийнхөө ирээдүйг ардчилсан зарчмаар сонгох ёстой” гэж тэмдэглээд өөрийнхөө гол зорилгыг Ливийн ард түмний хүсэл зориг эрх ашгийг хамгаалах явдал гэсэн байна.
Ливийн удирдагч Муаммар Каддафиг 2011 онд хөнөөсний дараа тус улсад хоёр засаглал тогтож өөр зуураа байлдсаар ирсэн. Нутгийн зүүн хэсэгт парламент, Х.Хафтарын удирдсан Ливийн үндэсний арми оршин тогтнож байсан бол баруун талд буюу нийслэл Триполид НҮБ-ын дэмжлэг хүлээсэн Файез Сарраж тэргүүтэй Үндэсний зөвшилцлийн Засгийн газар эрх барьж байсан. 2015 онд Марокко улсын Схират хотноо Ливи хоорондын хэлэлцээрээр Үндэсний зөвшилцлийн Засгийн газрыг байгуулсан. Энэ хэлэлцээрээр тус улсад бий болоод байгаа улс төрийн тогтворгүй нөхцөл байдлыг тогтворжуулах талаар тусгасан ч энэ шийдвэр амьдрал дээр хэрэгжилгүй өнөө хүрсэн.

ЭХ СУРВАЛЖ: "АРДЧИЛАЛ ТАЙМС" СОНИН