АНУ-ын Батлан хамгаалах яам үл мэдэгдэх үзэгдлийн гурван дүрс бичлэгийг анх удаагаа олон нийтэд албан ёсоор дэлгэлээ. Тэдний нэгийг 2004 оны арваннэгдүгээр сард авсан бол нөгөө хоёрыг нь 2015 оны нэгдүгээр сард бичсэн юм гэж Пентагоны албан ёсны сайтад мэдээлжээ. Гэхдээ энэ дүрс бичлэгүүдийг өмнө нь Пентагоны зөвшөөрөлгүйгээр интернэтээр цацсан юм байна. “Тараад байгаа энэ дүрс бичлэгүүд үнэхээр бодитой юу, эсвэл өөр зүйл үү гэсэн олон нийтийн эргэлзээг тайлахын тулд Батлан хамгаалах яам бичлэгүүдийг нийтэд дэлгэж байна. Дүрс бичлэг дээр байгаа энэ үзэгдэл урьдынхаараа үл мэдэгдэх зүйл” гэж Пентагон мэдэгдэлдээ дурджээ.
Цэргийн нисэх хүчний онгоцнуудаас авсан энэ дүрс бичлэг дээр гадаад төрхөөрөө ямар нэг нисдэг аппараттай төстэй обьект нисч байгаа нь харагдаж байна. 2014-2015 онуудад АНУ-ын Тэнгисийн цэргийн хүчний нисгэгчид агаарт явж байхдаа үл мэдэгдэх обьекттэй нэг бус удаа таарч байсан гэж The New York Times сонинд бичжээ. Тэдний нэг нь “салхины эсрэг” нисч байсан бол нөгөө нь “шоо хэлбэртэй” ч юм шиг харагдсан гэж нисгэгчид ярьсан байдаг. Уг хэвлэлийн сайтад 2017 онд нийтэлсэн нэг дүрс бичлэг дээр Америкийн хоёр сөнөөгч F/A-18 онгоц хувийн онгоцны хэмжээтэй үл мэдэгдэх биетийг олж харж байгаа нь бичигджээ.
Сан-Диегогийн эрэг дэх нисэх онгоц тээгч USS Nimitz дээрээс хөөрсөн нисгэгчид агаарт үл мэдэгдэх биет харснаа өөр зуураа ярьж байгаа бичлэгт тэр биет өндөрт салхины эсрэг цагт 120 миллийн (193 км/цаг) хурдтай нисч байгаад алга болсон гэцгээж байжээ. Хэдийгээр америкийн нисгэгчид Үл мэдэгдэх нисдэг биетийн тухай ингэж баримттайгаар мэдэгдсээр байгаа ч гэсэн АНУ-ын Ерөнхийлөгч Дональд Трамп ийм үл мэдэгдэх биеттэй учирсан гэдэгт нэг их итгэх хэрэггүй гэж 2019 оны зургадугаар сард мэдэгдэж байв.

ЭХ СУРВАЛЖ: "АРДЧИЛАЛ ТАЙМС" СОНИН