COVID-19-ийн халдварын тархалт, улс орнууд хилээ хааж хөл хорио тогтоосноос болоод тэр чигээрээ алдагдалд ороод байгаа манай гаргийн агаарын тээврийн салбар сэргэтлээ удна гэж “Boeing” компанийн ерөнхий гүйцэтгэх захирал Дэвид Кэлхун хэлж байна. Түүнийхээр энэ салбар хэвийн тогтвортой үйл ажиллагаандаа шилжтэл магадгүй 2-3 жил шаардагдана гэнэ. “Энэ хямрал урьд өмнө нь хэзээ нэг цагт бидний таарч байсан хямралтай огт адилгүй. Вирус тархахаас өмнөх үеийн түвшиндээ эргэн ортол олон жил өнгөрөх болно” гэж Америкийн агаарын хөлөг үйлдвэрлэгч концернийн тэргүүн хэлснийг “Интерфакс” хэвлэл эш татжээ.
Д.Кэлхун бас дэлхийн агаарын тээврийн компаниудын нийт орлого энэ 2020 онд 314 тэрбум доллароор буурна гэдгийг хэлсэн байна. “Бид урьдчилан таахын аргагүй, нөхцөл байдал маш хурдан өөрчлөгддөг тийм байдалд орчхоод байна. Нөхцөл байдал хэзээ тогтворжихыг хэлэхэд хэцүү. Байдал сайжрах тэр цагт зах зээл багасчихсан, бидний түншүүдийн хэрэглээ огт өөр болчихсон байх болно” гэж Boeing-ийн тэргүүн хэлжээ. Коронавирусийн тархалтаас болоод “Boeing” концерн ажилчдынхаа тоог 10 хувь цөөрүүлж магадгүй гэж өмнө нь мэдээлж байсан.

ЭХ СУРВАЛЖ: "АРДЧИЛАЛ ТАЙМС" СОНИН