Оросын дипломатууд чехийн иргэд, албан тушаалтнуудад халдахаар бэлтгэж байсан гэдэг нь нэг их ноцтой, ялангуяа ОХУ-ын Элчин сайдыг хөөж гаргахад хүрэх асуудал биш гэж Чехийн Ерөнхий сайд Андрей Бабиш дөрөвдүгээр сарын 28-нд мэдэгдсэн байна. Түүнийхээр Оростой харилцаатай холбоотой асуудлыг Чехийн Гадаад хэргийн сайд Томаш Петршчек хариуцаж байгаа гэнэ. Ерөнхий сайд энэ асуудлаас болоод Оросын Элчин сайдыг хөөж гаргахад хүрэхгүй гээд, Оросын зүгээс Чехийн дотоод хэрэгт хөндлөнгөөс оролцуулахгүй байхыг амлажээ. “Энэ үнэхээр үнэн бол аль нэг өөр улс манай иргэдийн эсрэг ийм үйлдэл гаргахыг хэрхэвч зөвшөөрөхгүй” гэж Ерөнхий сайд Андрей Бабиш хэлснийг РИА Новости эш татсан байна.
Харин Чехийн Сөрөг тагнуулын газрын дарга Ладислав Штиха хэвлэлээр мэдээлсэн тэр зүйл үнэхээр онц ноцтой үйлдэл гэж мэдэгджээ. Оросын дипломат паспорттой нэг хүн гурван долоо хоногийн өмнө Прагад үхлийн хор рицин бүхий чемодантай нисч ирсэн хэмээн Чехийн Respekt хэвлэл мэдээлсэн юм. Хэвлэлд мэдээлснээр ОХУ-ын Элчин сайдын яаманд буусан тэр эрэгтэй саяхан Зөвлөлтийн маршал Коневын хөшөөг буулгасан Прага-6 дүүргийн дарга Ондржей Коларж, Прага хотын захирагч Зденек Гржиба нарыг хөнөөх зорилготой байсан гэнэ.
Ийм дипломат ирснийг Чехийн Гадаад хэргийн яамны хэвлэлийн нарийн бичгийн дарга бас баталж байгаа юм. Харин ОХУ-ын Гадаад хэргийн яам дипломат хүн чехийн албан тушаалтнуудад халдах гэж байсан гэснийг няцааж Чехийн Гадаад хэргийн яаманд нот илгээсэн байна. Үүний өмнө Оросын тагнуулын газрын ажилтан байсан Сергей Скрипаль түүний охин Юлия нарыг хоёр жилийн өмнө Британийн нийслэл Лондон хотноо хордуулан алсан хэрэгт Оросын тагнуулын ажилтнуудыг сэжиглэдэг.

ЭХ СУРВАЛЖ: "АРДЧИЛАЛ ТАЙМС" СОНИН