Коронавирусийн халдварын тархалтаас болоод Эх орны дайны ялалтын 75 жилийн ойд зориулж Москвагийн Улаан талбайд хийдэг цэргийн парадыг өөрчилсөн ч гэсэн тавдугаар сарын 9-нд Оросын хотуудад нисэх хүчний парад болж, орой нь салют буудна гэж ОХУ-ын Ерөнхийлөгч Владимир Путин вирусийн халдвартай тэмцэх тухай зөвлөгөөний үеэр мэдэгдсэн байна. “Хөл хорио, тусгаарлалтын дэглэм, аюулгүй байдлын үүднээс бидний их баяр Ялалтын өдрийг тэмдэглэхийг хойшлуулсан. Гэхдээ бид улс орноороо, хамтдаа энэ баяраа тэмдэглэнэ” гэж В.Путин тэмдэглэжээ.
Уг нь Аугаа их ялалтын 75 жилийн ойгоор Улаан талбайд цэргийн парад хийж, Москва болон бусад хотуудад бүх нийтийг хамарсан “Мөхөшгүй хороо” аян зохиохоор төлөвлөж байсан гэнэ. “Дайнаас хойш дэлхий дахин анх удаагаа ийм том шалгууртай тулж байна. Өнөөдөр бид хүн ардын минь эрүүл мэндэд аюул учруулах тийм дайсантай тулалдаж байна” гэж Владимир Путин хэлжээ. Оросын Батлан хамгаалах яамны ойрын эх сурвалжийн хэлснээр Ялалтын 75 жилийн ойн баярыг намар есдүгээр сарын эхээр Дэлхийн хоёрдугаар дайн дууссан өдөр юм уу, арваннэгдүгээр сарын эхээр 1941 оны цэргийн парад болсон өдөр тэмдэглэж магадгүй гэнэ. Гэхдээ коронавирусийн халдварын дэгдэлт ямар байхаас шалтгаалан өдрийг товлоно гэснийг РБК хэвлэл мэдээлжээ.

ЭХ СУРВАЛЖ: "АРДЧИЛАЛ ТАЙМС" СОНИН