БНАСАУ-ын удирдагч Ким Чен Ун АНУ-ын Ерөнхийлөгч Дональд Трамптай уулзахыг хүсч байгаагаа мэдэгдсэн захидал ирүүлсэн гэж Цагаан ордны спикер Сара Сандерсын мэдээлснийг “Reuters” агентлаг дамжуулжээ. Пеньян, Вашингтон хоёр энэ талаар тохиролцож чадвал АНУ, БНАСАУ-ын тэргүүнүүдийн гурав дахь дээд хэмжээний уулзалт болох нь. “Энэ бол маш найрсаг, маш өөдрөг захидал” гэж тэр сэтгүүлчдэд мэдээлсэн байна.

С.Сандерс бас “Ким Чен Ун Америкийн тэргүүнтэй уулзахыг хүсч байна. Бид энэ саналыг хүлээн авч, хэдийнээ зохицуулж байна” гэж онцолжээ.
АНУ-ын Ерөнхийлөгчийн Үндэсний аюулгүй байдал хариуцсан туслах Жон Болтон бас БНАСАУ-ын удирдагчтай хэзээ ч гэсэн дээд хэмжээний уулзалт хийхэд АНУ бэлэн гэж мэдэгдээд байна.
АНУ, Умард Солонгосын хэлэлцээрийн гол асуудал нь Пеньяны цөмийн болон пуужингийн хөтөлбөр. Трамп, Ким Чен Ун хоёр өнгөрсөн оны зургадугаар сард Сингапурт уулзсан нь хоёр орны тэргүүнүүдийн түүхэн дэх анхны уулзалт байсан юм. Дараа нь энэ оны хоёрдугаар сард Вьетнамын нийслэл Ханойд уулзсан ч ямар нэг тохиролцоонд хүрч, баримт бичигт гарын үсэг зуралгүй өндөрлөсөн.

Дараа долоо хоногт Ким Чен Ун Өмнөд Солонгосын Ерөнхийлөгч Мун Же Интэй гурав дахь удаагаа уулзах гэж байна. Сөүл АНУ-ын Ерөнхийлөгч Дональд Трампыг оролцуулан гурвалсан уулзалт хийх санал тавьж байгаа юм. АНУ-ын Ерөнхийлөгчийг оролцуулах нь 1950-1953 оны Солонгосын дайныг бүрэн эцэс болгосон тухай хамтарсан тунхаг гаргах гол нөхцөл гэж Өмнөд Солонгос үзэж байгаа юм. Энэ мөргөлдөөний үр дүнд АНУ, Өмнөд Солонгос оролцсон олон улсын эвсэл гал зогсоох хэлэлцээрт л хүрснээс биш хоёр Солонгос нь өнөө хүртэл үндсэндээ дайны байдалд байгаа юм.