Японы Ерөнхий сайд Шинзо Абэ өчигдрөөс Иран улсад албан ёсоор айлчилж байгаа нь хоёр улсын 40 жилийн түүхэн дэх анхны тохиолдол болж байна. Японы Ерөнхий сайд айлчлалынхаа хүрээнд Ираны Ерөнхийлөгч Хасан Роухани, Исламын бүгд найрамдах улсын шашны тэргүүн Али Хаменеитэй уулзана.
Энэ айлчлал нь Токио, Тегераны хооронд дипломат харилцаа тогтоосны 90 жилийн ойтой давхцаж байгаа гэж Японы Сайд нарын танхимын ерөнхий нарийн бичгийн дарга Ёшихида Суга тэмдэглэжээ.
Иранд айлчилснаар энэ улстай нөхөрсөг харилцаагаа бэхжүүлнэ гэж Шинзо Абэ үзэж байна. Тэр Иранд айлчлахынхаа өмнө Саудын Араб, Арабын нэгдсэн Эмиратын удирдлага, АНУ-ын Ерөнхийлөгч Дональд Трамп нартай утсаар ярьж зөвлөлдсөн байна.

Зуучлагч

АНУ-ын тэргүүн Дональд Трамп өнгөрсөн сард Японд айлчлахдаа Ерөнхий сайд Шинзо Абэг АНУ болон Ираны хооронд зуучлагчийн үүрэг гүйцэтгэхийг сонирхож байгаагаа илэрхийлсэн. Цагаан ордны тэргүүн үүнийг санал болгохдоо Япон, Исламын бүгд найрамдах Иран улсын тэргүүнүүд сайн харилцаатайг сануулсан юм байна. Шинзо Абэг Иранд айлчлах тухай АНУ-ын ерөнхийлөгчийн үндэсний аюулгүй байдлын туслах Жон Болтоныг тавдугаар сарын 24-нд Токиод айлчлахад нь ярилцжээ. Үүний өмнөхөн Ш.Абэ Ираны Гадаад хэргийн сайд Мохаммад Жавад Зарифтай Токиод уулзсан юм.
Тэгэхээр цөмийн хэлэлцээрээс болж хурцдаад байгаа Тегеран, Вашингтон хоёрын харилцаанд Японы Ерөнхий сайд зуучлагч болох боломжтой байна. Японы хэд хэдэн шинжээч ч Шинзо Абэг зуучлагч болж бүрэн чадна гэж үзэж байгаа илэрхийлээд байна.

Ираны эргэн тойронд

Ираны цөмийн хөтөлбөрийн талаарх хэлэлцээрээс Вашингтон гарч байгаагаа тавдугаар сарын 8-нд зарласан. Энэ хэлэлцээрээр Тегеран цөмийн хөтөлбөрөө хязгаарлаж, хариуд нь НҮБ-ын Аюулгүйн зөвлөл, АНУ, Европын холбооны хоригийг өөрчлөхөөр тохиролцсон байсан юм. Ингээд АНУ арваннэгдүгээр сард Ираны эсрэг хоригоо сэргээж нефтийн худалдаанд нь хориг тавьсан юм. Өнгөрсөн тавдугаар сард Ираны шашны тэргүүн, Ерөнхийлөгч нь парламент Межилисийн депутатууд, өндөр албаны хүмүүстэй уулзахдаа Вашингтоныг эсэргүүцэж цаашид АНУ-тай хэлэлцээр хийхээс татгалзаж байгаагаа илэрхийлсэн. Харин АНУ-ын Ерөнхийлөгч Дональд Трамп ердөө маргааш нь Иран хэлэлцээрт эргэн орно гэдэгт итгэлтэй байна гэж мэдэгдсэн.