Умард Солонгосын удирдагч Ким Чен Ун бордоо үйлдвэрлэх заводын нээлтийн ажиллагаанд оролцон тууз хайчилж байгаа гэрэл зургийг БНАСАУ-ын мэдээллийн төв агентлаг ЦТАК дамжууллаа. Түүнийг мэс засалд орж бие нь муудсан, зарим хэвлэл бүр нас барсан гэж мэдээлж байсны дараа 20 хоноод тэрээр ийнхүү олны өмнө ил гарлаа. Солонгосын Хөдөлмөрийн намын төв хэвлэл Rodong Sinmun сонинд гарсан энэ мэдээллийг үндэслэн Өмнөд Солонгосын мэдээллийн Yonhap агентлаг, Умардын удирдагчийг 20 хоног нууцлаг байгаад анх удаагаа гарч ирлээ хэмээн тэмдэглэсэн байна.
БНАСАУ-ын Төрийн зөвлөлийн дарга зүрхний мэс засалд ороод эрүүл мэнд нь муудлаа хэмээн CNN өнгөрөгч дөрөвдүгээр сард мэдээлсэн. Телевиз түүнийг дөрөвдүгээр сарын 11-нд л хамгийн сүүлд олон нийтийн өмнө гарсан, дөрөвдүгээр сарын 15-нд болсон өвөг эцэг Ким Ир Сений мэндэлсний ойн ёслолын арга хэмжээнд олон жилийн хугацаанд анх удаагаа оролцсонгүй гэж онцолсон. Японы Shukan Genda хэвлэл ч бас түүнийг мэс заслын дараа бие нь эрс муудаад байна гэж мэдээлсэн. Хонконгийн хиймэл дагуулын теле сүлжээний эзэн Цин Фэн бүр Ким Чен Ун нас барсан гэж мэдэгдсэн. Харин БНАСАУ-ын гадаад орнуудтай соёлоор харилцах тусгай төлөөлөгч Алехандро Као де Бенос энэ бүх мэдээллийг няцааж байв.

Ким Чен Уныг эргэн ирсэнд Д.Трамп баяртай байна

 Умард Солонгосын тэргүүн Ким Чен Уныг эргэн ирсэнд АНУ-ын Ерөнхийлөгч Дональд Трамп баяртай байна гэж өөрийн Twitter хуудсандаа бичжээ. Ким Чен Уныг удаан хугацаагаар сураггүй байсны дараа эргэн ирсэн зургийг нь тавиад Америкийн Ерөнхийлөгч “Тэр эрүүл саруул эргэж ирснийг харсандаа би баяртай байна” гэж бичжээ. Ким Чен Ун удирдагч бордоо үйлдвэрлэлийн заводын нээлтэд оролцон тууз хайчилж байгаа гэрэл зургууд тавдугаар сарын 2-нд сүлжээгээр тарж түүнийг өвдсөн, үхсэн гэсэн цуу яриаг таслан эрүүл саруул байгаа нь харагдсан.