Дэлхий нийтийг хамарсан корона­вирусийн халдварын тархалт дэлхийн улс орнууд, хүн төрөлхтнийг түгшээж байгаа үед НҮБ-ын Соёл боловсрол, шинжлэх ухааны төрөлжсөн байгуул­лагын тогтоосон хэвлэлийн эрх чөлөөний өдрийг тэмдэглэн өнгөрүүллээ. Коро­на­вирусийн тархалт, аймшгийг бүрхэгдүүлэн нуух гэсэн оролдлого дэлхийн улс орнуудад цухалзаж хэвлэлийнхэнд үнэн зөв мэдээлэл өгөхгүй байх эрмэлзэл илэрсээр байгаа ч хаа сайгүй хөл хорио тогтоосон энэ үед хэвлэл мэдээллийн хэрэгсэл, сэтгүүлч сурвалжлагчид үүргээ гүйцэтгэсээр олон нийтэд үнэн зөв мэдээлэл түгээхийн төлөө явсаар байна. Иймдээ ч энэ өвчний үед нийгэм, олны дунд явж, эмнэлэг, хорио цээрийн бүс гээд эрсдэлт газруудаар явж эмч, өвчтөнөөс яриа сурвалжилга авч байгаа сэтгүүлч сурвалжлагч, хэвлэл мэдээллийн ажилт­нуудын эрүүл мэнд эрсдэлтэй байгааг мэргэжилтнүүд онцолж байна. Швейцарийн Press Emblem Campaign байгууллагын мэдээлснээр дэлхийн 23 улсын хэвлэл мэдээллийн хэрэгслийн 55 ажилтан сурвалжлагч коронавирусийн халд­вар авч нас бараад байгаа юм байна.
Өнөөдөр зохион байгуулах коронавирусийн тархалт, хөл хорио цээрийн дэглэмийн үед хэвлэл мэдээллийн байгууллагуудын гүйцэтгэх үүрэг сэдэвт онлайн хэлэлцүүлэгт НҮБ-ын Ерөнхий нарийн бичгийн дарга Антониу Гутерриш, ЮНСЕКО-гийн ерөнхий захирал Одрэ Азуле нар болон олон улсын байгууллагуудын удирдлага оролцоно. Энэ жилийн дэлхийн хэвлэлийн эрх чөлөөний өдрийг “Айдас хүйдэсгүй сэтгүүл зүй” уриан дор тэмдэглэж өнгөрүүллээ.