Казахстан улс биологийн зэвсэг боловсруулж байна гэсэн мэдээлэл гадаадын хэвлэлүүдээр гарсны хариуд БНКазУ-ын Гадаад хэргийн яам няцаасан хариу өгсөн байна. “Казахстан улс биологийн зэвсэг боловсруулаагүй, Алматы дахь төв лаборатори нь биологийн аюулгүй байдлыг хангах, үүний дотор коронавирус COVID-19-ийн халдвартай тэмцэхэд чиглэсэн үйл ажиллагаа эрхэлдэг юм” гэж тус улсын Гадаад хэргийн яам мэдэгджээ. Гадаад хэргийн яамны өнгөрсөн бямба гарагт нийтэлсэн энэ мэдэгдэлд бас “Гадаадын болон эх орны хэвлэл мэдээллийн хэрэгслүүдээр Казахстаны биологийн зориулалттай лабораторийн үйл ажиллагааны талаар үндэслэлгүй мэдээлэл тарсантай холбогдуулан” гэж онцлон тэмдэглээд “Казахстан улс биологийн ямар ч зэвсэг боловсруулаагүй, бусад улсын эсрэг ямар ч туршилт судалгаа хийгээгүй гэдгийг хариуцлагатайгаар мэдэгдэж байна” гэжээ. Алматыд 1948 онд байгуулсан Тахлын эсрэг Дундад Азийн эрдэм шинжилгээний хүрээлэн буюу өнөөдрийн М.Айкимбаевын нэрэмжит Гоц халдварын эсрэг Үндэсний анагаах ухааны төв, АНУ-ын тусламжтай байгуулсан Төв лаборатори нь “Казахстаны биологийн аюулгүй байдлыг хангах, шинжлэх ухааны суурь болон хавсарга судалгаа шинжилгээний ажил явуулдаг юм” гэж мэдэгдэлд тэмдэглэсэн байна. 

ЭХ СУРВАЛЖ: "АРДЧИЛАЛ ТАЙМС" СОНИН