Колумбын зэвсэгт дайчид тэнгисийн зүгээс Ла Гуайра мужийн нутгаар довтолсонтой холбогдуулан Венесуэлийн зэвсэгт хүчний анги нэгтгэлүүд байлдааны бэлэн байдалд шилжлээ гэж тус улсын Батлан хамгаалах яам мэдээлснээ албан ёсны сайтдаа байрлуулжээ. Энэ мэдээлэлд бас Зэвсэгт хүчин “Ямар ч аюулыг тэр даруйд нь няцаахад” бэлэн байна гэсэн байна. “Венесуэлийн Ерөнхийлөгч Николас Мадурод үнэнчээ баталж, улсынхаа тусгаар тогтнол, бүрэн бүтэн байдлыг хамгаалах үүргээ биелүүлэхээ мэдэгдье” гэж мэдэгдэлд дурджээ.
Тавдугаар сарын 3-ны ням гарагт Колумбын террорист зэвсэгт дайчид тэнгисийн зүгээс хөнгөн хөлгөөр Венесуэлийн зүг довтолсон. Венесуэлийн зэвсэгт хүчний дайчидтай мөргөлдөх үеэр зэвсэглэсэн дайчдын найм нь амь үрэгдсэн гэж Венесуэлийн Үндэсний хууль тогтоох байгууллагын тэргүүн Диосдадо Кабельо мэдээлснийг Гадаад хэргийн яам дамжуулжээ. “Хурдан завьтай, хэсэг хүмүүс манай руу довтлохоор төлөвлөж байгааг бид тагнуулын мэдээллээс авсан. Венесуэлийн зэвсэгт хүчин байлдааны өндөржүүлсэн бэлэн байдалд хэдийн шилжсэн байсан учраас довтолгоог няцааж чадлаа. Зэвсэгт дайчдаас найман хүнийг хөнөөж, хоёрыг шархдуулан зэвсгийг нь хурааж авсан” гэж Кабильо мэдэгджээ. Түүний хэлснээр зэвсэгт дайчид Венесуэльд террорист халдлага үйлдэх төлөвлөгөөтэй байсан гэнэ. Тэр бас “Энэ хүмүүсийн ард 2018 онд Ерөнхийлөгч Николас Мадурогийн амь насанд халдах гэж байсан хүмүүс л байгаа” гээд Венесуэлийн тэргүүнийг нийслэл Каракаст болсон цуглаанд үг хэлж байхад нь дрон ашиглан хөнөөх гэсэн оролдлогыг сануулжээ. Кабильо эцэст нь “Энэ бүхнийг АНУ-ын Засгийн газар зохицуулж, Колумбын нутгаас хэрэгжүүлж байгаа юм” гэсэн байна.

ЭХ СУРВАЛЖ: "АРДЧИЛАЛ ТАЙМС" СОНИН