Оросын агаарын тээврийн “Аэрофлот” компанийн албан ёсны төлөөлөгч Юлия Спивакова “Россия 24” телевизээр ярихдаа өөдрөгөөр авч үзвэл компани дэлхий даяар хийх нислэгээ зуны дундуур гэхэд сэргээж магадгүй гэж мэдэгдсэнийг ТАСС агентлаг дамжууллаа. Гэхдээ Спивакова одоогоор нислэгээ сэргээх тодорхой хугацаа товлох боломжгүй гэсэн байна.
Үүний өмнө S7 Group-ийн захирлуудын зөвлөлийн төлөөлөгч Владислав Филев коронавирусээс болоод хязгаарласан агаарын тээврийн олон улсын харилцаа бараг 2021 оны дөрөвдүгээр сард л сэргэж магадгүй гэж мэдэгдэж байсан. Түүнийхээр дэлхий дахинаа коронавирусийн халдварын ээлжит дэгдэлт гарч дахиад л хөл хорио, тусгаарлалтын дэглэмээ цаашид сунгах төлөв харагдаж байгаа гэнэ. Орос олон улсын агаарын тээврийн хөдөлгөөнөө гуравдугаар сарын 27-ноос зогсоогоод зөвхөн гадаадад байгаа иргэдээ татан авах нислэгийг Засгийн газрын шийдвэрээр хийж байгаа. Тавдугаар сарын 3-ны байдлаар Орост коронавирусийн халдвараар 134 мянган хүн өвчилж, 1280 хүн нас бараад байна.

ЭХ СУРВАЛЖ: "АРДЧИЛАЛ ТАЙМС" СОНИН