Оросын Калининград мужийн 100 эмч, эмнэлгийн дунд мэргэжлийн 250 ажилтан коронавирус COVID-19-ийн халдварын тархалтын үед халдвар тээсэн өвчтөнүүдтэй ажиллахаас татгалзлаа гэж мужийн Эрүүлийг хамгаалахын сайд Александр Кравченко мэдээлсэн байна. “Энэ хүнд үед үүргээ биелүүлж эмнэлгийн тусламж үзүүлэхээс харьцангуй олон хүн, 100 гаруй эмч, дунд мэргэжлийн 250 ажилтан татгалзаж ажиллахгүй гээд байна. Мэдээж тэдэнд өөр өөрийн шалтгаан байгаа л байх, бид шүүх эрх байхгүй. Коронавирусийн халдвар тархаж эхлэх үеэр л манай системийн 350 хүн “ингэж гараад явсан” гэж ноён А.Кравченко сэтгүүлчдэд мэдэгдсэнийг РИА Новости агентлаг эш татжээ.
Үүнээс үүдээд эмнэлгийн байгууллагууд 65-аас дээш насны олон эмч, сувилагчдаа дуудаж ажиллуулахад хүрсэн, ер нь манай муж бүр коронавирус тархахаас өмнө эмч мэрэгжилтний дутагдалд ороод байсан гэж сайд онцолжээ.
А.Кравченкогийнхоор бол коронавирусийн халдвар авсан өвчтөнүүдийг эмчлэхэд мужийн 93 эмч мэргэжилтэн тулж ажиллаж байгаа юм байна. Мужийн клиникийн 1.5 мянган хүн ажилладаг эмнэлэгт гэхэд нэг эмчид 95-100 хүн ногдож байгаа гэжээ. Орост эмч, эмнэлгийн мэргэжилтний хүрэлцээ дутагдалтайгаас болоод Москва хотын мэр Сергей Собянины хүсэлтээр эмнэлгүүдэд Ангаах ухааны сургуулиудын ахлах курсийн оюутнуудыг ажиллуулах асуудлыг судалж байгаа аж. Эх сурвалжийн мэдээлснээр Эрүүл мэндийн болон, Боловсрол шинжлэх ухааны яаманд ийм тушаал бэлтгэчхээд байгаа юм байна.