Венесуэль улс руу тэнгисийн зүгээс довтлох гэсэн зэвсэгт хүмүүсийн дунд Д.Трампын хувийн хамгаалалтын ажилтан, Америкийн хоёр иргэн байсан гэж Венесуэлийн Ерөнхийлөгч Николас Мадуро мэдэгдсэн байна. “Саатуулагдсан хүний нэг нь эхлээд мэдүүлэг өгөхдөө зэвсэгт халдлага хийсэн бүлэг дотор Америкийн хоёр иргэн, бүр АНУ-ын Ерөнхийлөгч Дональд Трампын хувийн хамгалаалтын албаны ажилтан байсан гэж мэдүүлсэн” гэж Николас Мадуро Twitter хуудсаараа дамжуулан мэдэгджээ. Мадурогийн мэдэгдлийг дамжуулсны дараа саатуулагдсан хүний нэг нь америкчууд түүнд “Д.Трампын аюулгүй байдал хариуцсан зөвлөхүүдийн ажлын талаар ярьж өгсөн” хэмээн ярьж байна. Мадурогийн хэлснээр бол Венесуэль рүү зэвсэглэн халдсан этгээдүүдийг одоо энэ халдлага болсон нутгийн хойд хэсэг Ла-Гуайра муж дахь тэнгисийн цэргийн баазад байлгаж байгаа юм байна.
Телевизээр бас саатуулагдсан хүмүүсээс хураан авсан баримт бичиг, радио холбооны хэрэгсэл, шөнийн харааны хэрэгсэл, зэвсэг, хээрийн хувцас, гэрэл зургуудыг харуулжээ.
Н.Мадуро бас саяхан АНУ-ын Төрийн нарийн бичгийн дарга Майк Помпеогийн Венесуэльд Элчин сайдын яамны ажиллагаагаа сэргээнэ гэж хэлсэнтэй энэ халдлага холбоотой байх гэжээ. “Хэдхэн хоногийн өмнө Майк Помпео Каракаст АНУ-ын Элчин сайдын яам нээх бэлтгэл ажлыг түргэсгэнэ гэж мэдэгдсэн. Ингэж хэлж байхад нь би бодож байсан минь энэ халдлагаар тэд үнэхээр манай хувьсгалыг, манай үндсэн хуулийн дэг журмыг, намайг устгах гэж байгааг баталж байна. Гэхдээ бурхан биднийг хамгаална” гэж Н.Мадуро хэлсэн байна.
Тус улсын умард нутгийн Ла-гуайра мужийн нутаг руу тэнгисийн зүгээс Колумбын зэвсэглэсэн этгээдүүд довтоллоо гэж Венесуэлийн Дотоод хэргийн сайд Нестор Ревероль мэдэгдсэн. Ерөнхийлөгч Николас Мадуро болохоор үүнийг өөрийг нь алах зорилготой үйлдэл гэж мэдэгдсэн. Үндсэн хуулийн үндэсний ассамблейн тэргүүн Диосдадо Кабельо халдлагын үеэр найман хүнийг устгаж, хоёр хүнийг саатуулсан гэж мэдэгдсэн. Түүний хэлснээр саатуулагдсан хүний нэг нь АНУ-ын хар тамхитай тэмцэх газрын төлөөлөгч байсан гэнэ. Сүүлд нь хоёр биш найман хүн баривчилсан нь тодорхой болсон.

ЭХ СУРВАЛЖ: "АРДЧИЛАЛ ТАЙМС" СОНИН