Мальт улсаас Финландад суугаа Элчин сайд Майкл Заммит Табона Германы канцлер Ангела Меркелийг Адольф Гитлертэй зүйрлэснийхээ төлөө огцорлоо гэж “Times of Malta” мэдээлжээ. Тэрээр энэ сарын 8-нд Дэлхийн хоёрдугаар дайн Европт дууссаны ойн босгон дээр Германы Канцлер А.Меркелийг гуравдугаар рейхийн фюрертэй жишээд хэлчихсэн юм байна. “75 жилийн өмнө бид Гитлерийг зогсоосон. Одоо Ангела Меркелийг хэн зогсоох вэ. Тэр Европт хяналт тогтоох гэсэн Гитлерийн мөрөөдлийг биелүүлж байна” гэж Заммит Табона өөрийнхөө Facebook хуудсанд бичсэн гэнэ. Үүнийхээ төлөө Заммит Табона албан тушаалаасаа огцорсныг Мальтын Гадаад хэргийн сайд Эварист Бартоло батлан хэлсэн байна. Мөн энэ “таагүй” нийтлэлийн төлөө Германы ЭСЯ-нд уучлал хүссэн илгээлт явуулсан гээд Гадаад хэргийн сайд Заммит Табоны мэдэгдэл нь хоёр орны найрамдал, харилцан хүндэтгэлд нөлөөлөхгүй гэж онцлон тэмдэглэжээ.
Харин Мальтын сөрөг хүчний удирдагч Адриан Делия болохоор Заммит Табоны нийтлэл нь Элчин сайдын хэмжээнд хүрэх асуудал биш гэсэн байна. Тэрээр Ангела Меркель Мальт улсыг төрөл бүрийн асуудлаар, ялангуяа ардчиллын төлөөх тэмцэлд дэмжиж ирсэн гэжээ.

ЭХ СУРВАЛЖ: "АРДЧИЛАЛ ТАЙМС" СОНИН