Энэ оны нэгдүгээр улиралд дэлхийн том хотуудад тансаг орон сууц, үл хөдлөх хөрөнгийн үнэ өнгөрөгч 2019 оны мөн үетэй харьцуулахад хямдарлаа гэж зөвлөгөөний Knight Frank компанийн явуулсан судалгааны эх сурвалжаас аван Bloomberg агентлаг мэдээлсэн байна.
Шинжээчдийн мэдээлснээр Лондон, Бээжин, Куала-Лумпур хотуудад үнэтэй тансаг орон сууцны үнэ 1-2, Ванкувер, Дублин, Санкт-Петербург хотод 2-3, Нью-Йорк, Бангкок, Найроби хотуудад 3-5 хувь хямдарсан гэнэ. Судалгаанд хамрагдсан Азийн таван том хотод тансаг үл хөдлөх хөрөнгийн үнийн өсөлт хамгийн доод түвшинд хүрсэн байна. Энэ нь шинэ төрлийн коронавирусийн халдвар чухам энэ бүс нутгаас эхлэн тархсантай шууд холбоотой. Үл хөдлөх хөрөнгийн зах зээл энэ улиралд Их Британи, АНУ-д нэг их хэлбэлзэж, сөрөг үзэгдэл ажиглагдаагүй, хоёрдугаар улирлаас л нөлөөлж эхлэх байх гэж Knight Frank тэмдэглэсэн байна. Гэхдээ хэдийгээр коронавирусийн халдвар тархаж байгаа ч гэсэн Токио, Мадрид, Стокгольм, Сидней зэрэг том хотод тансаг сууцны үнэ өссөн дүн гарчээ. Харин олон улсын агаарын тээврийн харилцаа зогссоноос болоод тансаг харш сууцны худалдаа, борлуулалт буурч байгаагаас үзэхэд ийм үл хөдлөх хөрөнгийн үнэ цаашид илүү боломжийн болох найдлага байна гэж судлаачид тэмдэглэсэн байна.

ЭХ СУРВАЛЖ: "АРДЧИЛАЛ ТАЙМС" СОНИН"