АНУ-ын Ерөнхийлөгч Дональд Трамп сэтгүүлчдэд уурлан ээлжит хэвлэлийн бага хурлаа орхилоо гэж РИА Новости агентлаг мэдээлжээ. Хэвлэл мэдээллийнхэнд зориулан хийсэн хэвлэлийн бага хурлын үеэр Америкийн тэргүүн АНУ бусад орныг бодвол коронавирусийн оношлуур илүү ихийг хийсэн гэж мэдээлжээ. Харин сэтгүүлчдийн нэг нь Д.Трампаас улс оронд хүмүүс энэ өвчнөөр нас барсаар байхад та яагаад дандаа оношлуурын тооны тухай ярьдаг юм гэж асуусан байна. Цагаан ордны тэргүүн хариуд нь та энэ асуултаа надад биш, харин Хятадаас асуу гээд сэтгүүлчийг “муухай” асуулт асуулаа гэжээ.
Тэгээд сэтгүүлчийн дараагийн асуултуудад Д.Трамп хариулахаас татгалзаж хэвлэлийн хурлаа орхин гарчээ. Хэвлэл мэдээллийнхэн, сэтгүүлчид түүнээс асуулт асуух гэсэн ч тэр хариулсангүй.
Д.Трамп өнгөрсөн дөрөвдүгээр сард бас коронавирустэй хэрхэн тэмцэж байгаа тухай өдөр тутмын хэвлэлийн бага хурал, мэдээлэл нь зүгээр л цаг үрсэн ажил хэмээн, үүндээ сэтгүүлчдийг буруутгаж байсан. Түүнийхээр сэтгүүлчид энэ үеэр өдөөн хатгасан асуулт асуудаг, дараа нь үнэн бодит баримтыг мэдээлдэггүй гэнэ. “Тэдний нэр хүнд өсөөд л байдаг, харин америкчууд худал мэдээллээс өөрийг хүлээн авдаггүй. Цаг хугацаа, хүч барсан ажил” гэж Д.Трамп бичсэн байна.
Хамгийн сүүлийн мэдээгээр АНУ-д коронавирусийн халдвараар 1.344.512 хүн өвчилж 80 мянга гаруй хүн нас бараад байгаа. Харин 216.169 хүн халдвар авсан ч эдгэрчээ.

ЭХ СУРВАЛЖ: АРДЧИЛАЛ ТАЙМС" СОНИН