Коронавирусийн халдварын тархалтаас болоод тогтоосон хөл хорио, хязгаарлалт нь дахиад шинэ төрлийн халдварын тархалтад хүргэж магадгүй гэж барууны хэвлэл мэдээллийн хэрэгслүүд бичиж эхэллээ. CNBC хэвлэлд бичсэнээр эрдэмтэд судалгаа хийсний үндсэн дээр өнөөгийн энэ хязгаарлалт, хөл хорио нь сүрьеэгээр өвчлөх, нас барах явдлыг нэмэгдүүлнэ гэсэн таамаг гаргасан байна. Энэ нь дэлхий дахин халдварын эсрэг тэмцэх шинэ кампани өрнүүлэхэд хүргэнэ гэжээ. Судлаачдынхаар сүүлийн таван жилд манай гаргийн 6.3 сая хүн өвчилж 1.4 сая хүн энэ өвнөөс нас барсан гэж байна.
Ер нь сүрьеэг оношлох ажил тааруу байгаагаас 2020-2025 онд хүмүүс энэ өвчнөөр өвчилсөөр л байх болно гэж эрдэмтэд анхааруулжээ. “Энэ тун таагүй сонсогдож байж мэднэ, гэхдээ бий болох нөхцөл байдлыг ингэж тодорхой хэлснээр энэ эрсдэлээс гарах арга хайх, зайлсхийх боломж олгоно” гэж Stop TB Partnership-ийн гүйцэтгэх захирал Лучика Дитиу онцолсон байна.
Өнөөдөр ганцхан коронавирусийн тухай ярьж, түүнийг эмчлэх тухай биш бүхий л өвчнийг эмчлэх тухай ярих хэрэгтэй байна. Маш олон хүн өөр бусад өвчнөөр өөд болж байна. Дэлхийн эрүүл мэндийн байгууллага сүрьеэг “хамгийн их үхэлд хүргэдэг халдварт өвчин” гэж нэрлээд жил бүр уг өвчнөөр 10 сая хүн халдварлаж, 1.5 сая хүн энэ өвчний улмаас нас барж байна гэж мэдээлдэг. Гэхдээ сүрьеэ нь антибиотикоор эмчлэгддэг өвчин. Тэгэхээр хамгийн гол нь өвчнийг тухай бүр илрүүлэн оношилж чадвал эмгэнэлтэй үр дагавраас зайлсхийж болно гэж мэргэжилтэн хэлжээ.

ЭХ СУРВАЛЖ: "АРДЧИЛАЛ ТАЙМС" СОНИН