Коронавирус COVID-19-ийн халдварын тархалттай холбоотойгоор ОХУ-ын хийсэн эрүүл ахуй тусгаарлалтын дэглэм, ажлын бус өдрүүдийг цуцлах асуудлаар хийсэн зөвлөгөөн дээр ОХУ-ын Ерөнхийлөгч Владимир Путин хамгийн тулгамдсан асуудал нь ажилгүйдлийн түвшин гэж онцолсон байна. Орос дахь ажилгүйчүүдийн тоо дөрөвдүгээр сард өмнөх гуравдугаар сарын сүүлчтэй харьцуулахад хоёр дахин нэмэгдэж 1.4 саяд хүрчээ. Ажилгүйдлийн өнөөгийн энэ байдлыг Владимир Путин жирийн биш хэрэг гээд, иргэдийг дэмжих нэмэлт арга хэмжээ шаардаж байна гэснийг РИА Новости агентлаг эш татсан байна. “Нөхцөл байдал ийм байгаа нь хөдөлмөрийн зах зээлийг тогтворжуулах, ажлаа алдсан хүмүүсийг дэмжих талаар цогц арга хэмжээ авахыг шаардаж байна. Энэ талаарх шийдвэрийн төсөл бэлтгэж тавдугаар сард багтаан тусгайлан хэлэлцэхийг Засгийн газраас хүсье. Бидний гол зорилт бол цаашид ажилгүйдэл өсөх эрсдэлийг эрчимтэй бууруулах явдал” гэж В.Путин мэдэгджээ.
Үүнтэй холбоотойгоор ажилгүйдэл цаашид эрчимтэй өсөхөөс сэргийлэх, ажилгүй болж байгаа иргэдэд туслахын тулд зээлийн хөтөлбөр хэрэгжүүлж байгаа талаар “Говорит Москва” радио мэдээллээ. Зургадугаар сарын 1-нээс 2021 оны дөрөвдүгээр сарын 1 хүртэл хэрэгжих энэ хөтөлбөрийн зээлийн хүү хоёр хувь юм байна. Ерөнхийлөгчийн хэлснээр тухайн аж ахуйн нэгж ажлын байраа 90 хувийн түвшинд хадгалж чадвал бүх зээлийг нь улс төлөх юм байна. Ажлын байраа 85 хувь хадгалсан аж ахуй нэгжийн зээлийн 50 хувийг улс төлнө.

ЭХ СУРВАЛЖ: "АРДЧИЛАЛ ТАЙМС" СОНИН