Умард Атлантны цэргийн эвсэл НАТО-гийн ерөнхий нарийн бичгийн дарга Йенс Столтенберг энэ эвсэл цөмийн зэвсгээс татгалзахад бэлэн биш байна, үүний гол буруутан нь Орос, Хятад хоёр улс гэж мэдэгдсэн байна. Тэрээр НАТО цөмийн зэвсгээс татгалзах эрмэлзэлтэй байгаа ч, өнөөдөр дэлхий дахинд тийм нөхцөл бүрдээгүй болохоор эвсэл өөрийн хүчин чадлаа хадгалсаар байх болно гэснийг Frankfurter Allgemeine Zeitung хэвлэл дамжуулжээ. Өнөөдөр Орос, БНХАУ, бусад хэд хэдэн орон цөмийн зэвсэгтэй байгаа нь эвсэл аюулгүй байдлын үүднээс үүнээс татгалзах боломж одоохондоо алга гэж Й.Столтенберг хэлсэн байна. Одоохондоо НАТО цөмийн зэвсэг хадгалсаар байгаа нь гишүүн орнуудтай тохиролцсоны үндсэн дээр ийм эрхтэй, яагаад гэвэл энэ байгууллага батлан хамгаалах үүрэгтэй гэжээ. Харин манай атомын хүчин чадал сөргөлдөөн үүсгэхэд зориулагдаагүй, гагцхүү эсрэг талын хүчийг хязгаарлах, түрэмгийллийн төрөл бүрийн хэлбэрийг тогтоон барих зориулалттай гэсэн байна. Коронавирусийн халдварын тархалтын энэ үед ч терроризм, БНАСАУ цөмийн зэвсэг турших, Оросын зүгээс “Түрэмгийлэх ажиллагаа явуулах зэрэг аюул байсаар байна” гэж Столтенберг онцолсон байна. Тэр бас сүүлийн жилүүдэд Москва байлдааны хүчин чадлаа идэвхтэй санхүүжүүлж байгааг дурдаад ОХУ-ын Крымд хууль бус үйл ажиллагаа явуулж байгааг дурджээ.

ЭХ СУРВАЛЖ: "АРДЧИЛАЛ ТАЙМС" СОНИН