Дэлхийн улс орнуудын Засгийн газар хүлэмжийн хийн ялгаруулалтыг бууруулах талаар тодорхой арга хэмжээ авахгүй юм бол ирэх 300 жилд далайн усын түвшин гурван метрээр нэмэгдэнэ гэж цаг уур судлаачид үзэж байна. Улс орнууд дэлхийн цаг уурын өөрчлөлтийн талаар ямар нэг гэрээ хэлэлцээр хийж эхлэхгүй бол 2100 он гэхэд далайн усны түвшин нэг метрээр, 2300 он гэхэд таван метрээр нэмэгдэнэ гэж үзэж байгаагаа цаг уурчид шинжлэх ухааны Climate and Atmospheric Science сэтгүүлд нийтэлжээ.
Өгүүлэл зохиогчид агаар мандалд ялгарах хүлэмжийн хийг хязгаарлах нь дэлхийн далайн усны түвшин нэмэгдэх явцыг өнөөгийнхөөс бууруулахад чухал ач холбогдолтой гэж тэмдэглэсэн байна. Хүн төрөлхтөн агаарын температурын өсөлтийг целсийн 1.5 градуст барьж чадахгүй л бол манай дэлхийн нүүр царай тун удахгүй эрс өөрчлөгдөнө гэж манай гаргийн тэргүүлэх эрдэмтэд үзэж байна. Үүнийгээ баримт нотолгоо болгож тэд хиймэл дагуул, цаг уурын станцуудын мэдээлэл, компьютерийн тооцоолол, загварчлалыг хавсаргажээ.
Гренланд, Арктик, Антарктидын олон мөсөн уул, гол хайлж байгаагаас далайн усны түвшин эрчимтэй нэмэгдэж, энэ нь эко систем болон хүмүүсийн амьдрал маш хүчтэй сөргөөр нөлөөлнө. Тэгэхээр хүний буруутай үйл ажиллагаанас болоод агаар мандалд ялгарч байгаа хүлэмжийн хийг бууруулах юм бол энэ үйл явцыг удаашруулж болно гэнэ.
Майнутын их сургуулийн доцент Ниам Кэхилл, бусад эрдэмтэд дэлхийн далайн усны түвшин хэрхэн нэмэгдэж байгаа талаар өөрсдийнхөө загварыг гаргахгүйгээр, харин энэ чиглэлээр ажилладаг дэлхийн тэргүүлэх 100 судлаачаас асуулга явуулж нэгтгэсэн байна. Эрдэмтдийн санал, цуглуулсан баримт өмнө нь НҮБ-ын гаргаж байсан албан ёсны таамаглалаас огт өөр гарчээ. Өөрөөр хэлбэл НҮБ далайн усны түвшинг 30-50 см дээшилнэ гэж байсан бол цаг уурчид үүнийг нэг метр, түүнээс ч илүү гэж хэлсэн байна.
Гренландын мөс хайлж байгаа үйл явцыг ойлгохгүйгээр өнөөдөр яг таг тодорхой таамаглал гаргах боломжгүй гэж судлаачид тэмдэглэжээ. Улс орнууд Парисын хэлэлцээрийг ядаж хэсэгчлэн биелүүлж температурын өсөлтийг 2°С градусаас хэтрүүлэхгүй байж чадвал дэлхийн далайн усны түвшин ирэх зууны эхэн гэхэд 50 см, харин 2300 онд 05-2 метрээр нэмэгдэнэ гэж шинжээчид үзэж байгаагаа энэ өгүүлэлд тэмдэглэсэн байна.

ЭХ СУРВАЛЖ: "АРДЧИЛАЛ ТАЙМС" СОНИН