Польшийн Ерөнхийлөгч Анжей Дуда улс орныхоо Үндэсний аюулгүй байдлын шинэ баримтлалаа өөрийн албан ёсны сайтдаа нийтэлсэн байна. Энд “Манай хамгийн ноцтой аюул бол цэргийн хүчиндээ асар их хөрөнгө зарж байгаа Оросын холбооны улсын Засгийн газрын шинэ эзэнт гүрний бодлого болж байна” гэж өгүүлжээ. Тус улс Үндэсний аюулгүй байдлын өмнөх баримтлалаа 2014 онд гаргаж байсан. “Гүржийн эсрэг түрэмгийлэл, Крымыг хууль бусаар өөртөө нэгтгэсэн, Украины дорнод нутаг дахь үйл ажиллагаа нь олон улсын эрх зүйн үндсэн зарчмыг зөрчиж, Европын аюулгүй байдлын үндсийг сүйрүүлж байна. Энэ бүхэн Оросын холбооны улс өөрийн хүч, нөлөөллийн хүрээгээ тэлэхийн тулд олон улсын эрх зүйн үндсэн зарчим, дэлхийн дэг журмыг зөрчиж, энэ бодлогоо ч үргэлжлүүлсээр байна” гэж уг баримт бичигт дурджээ.
“Үндэсний аюулгүй байдлын энэ шинэ стратеги нь юуны түрүүнд Польшид болон дэлхий дахинд сүүлийн таван жилд гарсан өөрчлөлтийг тусгасан. 2014 онд Польшид НАТО, АНУ-ын цэрэг байрлаж байгаагүй. Энэ бол огт өөр ажиллагаа. Өнгөрсөн таван жилд Польшийн армийн бие бүрэлдэхүүн 30 мянган цэргээр нэмэгдэж, манай батлан хамгаалахад зарцуулж байгаа санхүүжилт бараг 40 хувиар өссөн” гэж Анжей Дуда мэдэгдсэн байна.
Өнгөрөгч 2019 оны сүүлчээр Орос, Польшийн хооронд дипломат дуулиан гарч байсан. ОХУ-ын Ерөнхийлөгч Владимир Путин фашист Германы удирдагч Адольф Гитлерийн үед Берлинд ажиллаж байсан Польшийн Элчин сайдыг “бэлтрэг”, “үндсэрхэг гахай” гээд нэрлэчихсэн. Польшийн парламент Сейм хариуд нь Дэлхийн хоёрдугаар дайн эхлүүлсэн хариуцлагыг Зөвлөлт холбоот улс, Герман хоёр хүлээх ёстой гэж тогтоол гаргасан.

ЭХ СУРВАЛЖ: "АРДЧИЛАЛ ТАЙМС" СОНИН