Хятад, АНУ-ын хооронд дайн гарах магадлал улам бодитой болж байна гэж Израилийн төрийн зүтгэлтэн, дипломат Яков Кедми хэлснийг Evo-rus.com хэвлэл нийтэлсэн байна. Түүнийхээр АНУ, Хятадын хоорондох зөрчилдөөн сүүлийн үед улам шинэ шатанд гарч байгаа гэнэ. АНУ-ын Засгийн газар БНХАУ-ыг коронавирусийн халдварыг тархаалаа гэж буруутгасан суртал нэвтрүүлгийг өргөн хэмжээгээр цацаж байна. Хятад ч хариуд нь саяхан хийсэн худалдааны хэлэлцээрээ зөрчих, АНУ-ын өрийг зарах боломж гээд эдийн засгийн арга хэмжээнүүд авах тухай ярих боллоо. АНУ бас БНХАУ-ын стратегийн чухал обьектуудаас холгүй цэргийн бааз байгуулахаар оролдож байгаа нь хатуу хариу арга хэмжээ авахад хүргэж болзошгүй гэж Я.Кедми тэмдэглэжээ. Энэ бүхэн нэг их том биш ч мөргөлдөөн, дайны эхлэл болж мэдэх юм гэж шинжээч бичээд тухайлбал Тайванийн арлын төлөө зэвсэгт мөргөлдөөн болж мэднэ гэжээ. Өргөн хэмжээний дайн болсон тохиолдолд Америкт учрах үр дагавар нь аймшигтай байна гээд энэ сөргөлдөөн болбол Орос улс Хятадыг дэмжинэ, тэгээд хоёр том гүрний эсрэг АНУ ганцаар босно гэдэг бараг л боломжгүй зүйл гэж Я.Кедми тэмдэглэсэн байна.

ЭХ СУРВАЛЖ: "АРДЧИЛАЛ ТАЙМС" СОНИН