БНХАУ-тай хийж байгаа худалдааны тэнцэл алдагдалтай байгаад Австралийн Үндэсний фермерийн холбооны төлөөлөгчид бухимдаж байгаагаа мэдэгдсэнийг “Коммерсантъ” хэвлэл тавдугаар сарын 13-нд дамжууллаа. Мэдэгдэлд Австралийн фермерүүдийн хөдөө аж ахуйн бүтээгдэхүүний гуравны хоёр нь экспортод гарч байгаа бол Хятадын бүтээгдэхүүн 28 хувь л болж байна гэжээ. Австралиас Хятад руу нийлүүлж байгаа үндсэн бүтээгдэхүүн нь үхрийн мах, үр тариа байна. Үүнээс гадна хөвөн даавуу, ноос, сүү болон жимс, хүнсний ногоо, далайн бүтээгдэхүүн орж байна гэж Үндэсний фермерийн холбооны тэргүүн Фиона Симсон мэдэгдсэн байна.
Саяхан Хятадын гаалийнхан Австралийн үхрийн мах, арвайг эрүүл ахуйн шаардлага хангахгүй байна хэмээн саатуулсан. Үүнээс гадна Хятадын Засгийн газар Австралийн арвайд 80 хувийн татвар ногдуулна гэж мэдэгдсэн нь Австралийн фермерүүдийн бухимдлыг төрүүлсэн байна.
Коронавирусийн халдварын цар тахал БНХАУ-аас эхлэлтэй, үүнийг мөрдөн шалгах ёстой гэсэн АНУ-ын санаачилгыг Австралийн Засгийн газар идэвхтэй дэмжсэний дараа хоёр орны худалдааны харилцаан дахь энэ зөрчил эхэлсэн. Хятадын Засгийн газар коронавирусийн тархалттай холбоотойгоор ингэж мөрдөн шалгах гэсэн оролдлого нь барууны зүгээс үзүүлж байгаа дарамт шахалт гэж үзэж байгаа юм.

ЭХ СУРВАЛЖ: "АРДЧИЛАЛ ТАЙМС" СОНИН