АНУ-ын Хөдөө аж ахуйн яам энэ 2020 онд дэлхий дахины хураан авах ургацын хэмжээг тооцоолж гаргахад Орос урьд өмнө авч байгаагүй их ургац авна гэсэн тоо гарчээ. Америкийн шинжээчид Оросыг энэ жил 77 сая гаруй тонн улаан буудай хураан авч ингэснээрээ дэлхийн зах зээлд улаан буудай нийлүүлэлтээрээ тэргүүлнэ гэж тооцоолсон байна. Үүнээс гадна эрдэнэ шиш, арвай гээд бусад үр тариа 39.4 сая тонныг хураан авснаар нийт ургацын хэмжээ нь 116.4 сая тоннд хүрнэ гэжээ.
Оросын Хөдөө аж ахуйн яам дөрөвдүгээр сарын эхээр гаргасан төлөвтөө энэ жилийнхээ ургацын хэмжээг 125.3 сая тонн гэж гаргаж байсан. Энэ нь буурцагт ургамал, сагагийн 4-5 сая тонн ургацыг, мөн Крымээс хураах ургацаа оруулаад тооцсон хэрэг байсныг америкчууд тоооцоогүйтэй холбоотой. Оросын Краснодар, Ставрополийн хязгаарт ган нүүрлэж, өөр зарим мужид дөрөвдүгээр сард хэт хүйтэрсэн учраас нэлээд ургац алдахаар байгаа юм.
Гэхдээ л Орос дөрвөн жил дараалан дэлхийд хамгийн их үр тариа экспортлогч орон хэвээр үлдэхээр байна. Харин одоо бол коронавирусийн цар тахлын улмаас Орос үр тарианы экспортдоо хязгаарлалт тогтоогоод дөрөвдүгээр сараас зургадугаар сарын 30 хүртэл долоон саяас илүү үр тариа гадагш гаргахгүй байгаа юм. Үүнээс болоод ч тэр үү дэлхийн зах зээл дээр үр тарианы хомсдол үүсээд байна.

ЭХ СУРВАЛЖ: "АРДЧИЛАЛ ТАЙМС" СОНИН