Коронавирус COVID-19-ийг тархаасан хэмээн буруутгаж Хятадын эсрэг хориг тавих хуулийн төсөл АНУ-ын Сенатад өргөн барьсныг Хятадын Засгийн газар шийдвэртэй эсэргүүцэж байна гэж БНХАУ-ын Гадаад хэргийн яамны албан ёсны төлөөлөгч Жао Лизянь тавдугаар сарын 13-ны лхагва гарагт мэдэгдсэн байна. “АНУ-ын зарим сенатчийн өргөн барьсан энэ хуулийн төсөл нь коронавирусийн халдварын тархалттай тэмцэх ажил урагшгүй байгаад Хятадыг буруутган хариуцлага тооцох гэж мөрдөн шалгах ажил эхлүүлэх гэсэн оролдлогын илрэл, Энэ бол боломжгүй. Бид үүнийг шийдвэртэй эсэргүүцэж байна” гэж түүний хэлснийг РИА Новости агентлаг эш татжээ.
АНУ-ын сенатч бүгд найрамдах намын төлөөлөл Линдси Гэрм Америкийн тэргүүн Дональд Трампын ярьж байснаар Конгресст коронавирусийн халдварын үүслийн талаар Хятадтай хамтран ажиллахаас татгалзах, хориг тавих хуулийн төсөл өргөн барьсан нь тавдугаар сарын 13-нд тодорхой болсон юм. АНУ-ын Төрийн нарийн бичгийн дарга Майк Помпео бас шинэ төрлийн коронавирус нь Хятадын Ухань хотын лабораториос алдагдсан “ноцтой баримт баталгаа” байгаа гэж тавдугаар сарын 3-нд мэдэгдэж байсан.
Гэтэл коронавирус COVID-19-ийг үүсгэгч SARS-CoV-2 нь лабораторийн нөхцөлд үүссэн гэдгийг Америкийн эрдэмтэд няцаасан. Тэднийхээр энэ вирус амьтнаас гаралтай гэж үзэж байгаа аж. Дэлхийн эрүүл мэндийн байгууллага ч бас коронавирусийг байгалийн гаралтай гэж мэдэгдсэн. Коронавирусийн халдварын тархалтын төлөө БНХАУ-д хариуцлага тооцох хэд хэдэн хувилбар байна гэж Дональд Трамп дөрөвдүгээр сарын 28-нд мэдэгдсэн. АНУ үүний төлөө Хятадаас хэдэн арван тэрбум долларын нөхөн төлбөр шаардаж магадгүйг үгүйсгээгүй юм. Хамгийн сүүлд Цагаан ордны Худалдааны үндэсний зөвлөлийн тэргүүн Питер Наварро Хятадын удирдлага өөрийн иргэдийнхээ гадаадад аялахыг хориглолгүйгээр коронавирусийг дэлхий даяар тархааж дэлхийн дахинд асар их хохирол учруулсан гэж мэдэгдээд “Хятад үүнийхээ төлөө төлбөр төлөх ёстой” гэсэн байна.

ЭХ СУРВАЛЖ: "АРДЧИЛАЛ ТАЙМС" СОНИН