Венесуэлийн Ерөнхийлөгч Николас Мадуро, Оростой батлан хамгаалах салбарт 209 сая ам.долларын гэрээ хийсэн байна хэмээн АНУ-ын Ерөнхийлөгчийн Үндэсний аюулгүй байдал хариуцсан зөвлөх Жон Болтон ням гарагт шүүмжилсэн байна. “Венесуэльчүүд жинхэнэ ардчилсан удирдлага хүсч байгаагаас биш хэлмэгдүүлэл хүсээгүй” гэж Ж.Болтон хэлсэн байна. Гэрээнд чухам юу юу гэж заасан юу авч өгөх гэж байгаа талаар Ж.Болтон тодорхой дурдаагүй байна. Ж.Болтоны энэ мэдэгдлийн талаар Москва ямар нэг тайлбар өгөөгүй өнгөрчээ.
Орос улс Венесуэльд зэвсэг нийлүүлэх ажлаа үргэлжлүүлсээр байна гэж ОХУ-ын төрийн өмчийн “Ростех” корпорацын тэргүүн Сергей Чемезов зургадугаар сарын эхээр мэдэгдэж байсан юм. Тэр бас цаашид ч зэвсэг нийлүүлэх шинэ гэрээ хийнэ гэж онцолсон.

Венесуэль нь Латин Америкийн бүсэд оросын зэвсэг, цэргийн техник худалдан авдаг томоохон импортлогч улс. Орос ч цэргийн техник зээлээр нийлүүлдэг. Орос-Венесуэлийн хоорондох зэвсэг, цэргийн техникийн гэрээ 11 тэрбум ам.долароор хэмжигдэж байгаа юм. Венесуэль Оросын агаараас эсэргүүцэн хамгаалах хөдөлгөөнт хэрэгсэл, дунд тусгалын зенит пуужингийн “Бук-М2” цогцолбор, алсын зайны “Антей-2500” авсан юм. Үүний зэрэгцээ оросууд Латин Америкийн түншдээ шинэчилсэн АК-103 загварын 100 мянган “Калашников” автомат, Су-30МК2 сөнөөгч онгоц, Ми-35М нисдэг тэрэг, Т-72 танк, хуягт тээвэрлэгч БМП-3, БТР-80 нийлүүлсэн юм.