Германы MDR телевиз Зөвлөлт холбоот улс, Бүгд найрамдах ардчилсан Герман улс хоёрын харилцааны тухай нэвтрүүлэгтээ Германд байрлаж байсан Зөвлөлтийн цэрэг нь түрэмгийлэгчид байсан гэж ярьжээ. Энд өгүүлж байгаагаар 1980-аад онд Москва, Зүүн Берлин хоёрын найрамдалт харилцаа гэдэг нь ёстой л зөвхөн ухамсрын, хувь хүний түвшинд байсан гэнэ. “Ардчилсан Германд байрлаж байсан Зөвлөлтийн цэргийнхэн, нутгийн иргэдийн хооронд л харилцаа байсан, тэд бүр хуримладаг байсан. Гэхдээ Германд байсан оросууд олон хүний нүдэнд яг л түрэмгийлэгчид хэвээрээ үлдсэн. Маневр хээрийн сургууль хийж, эвдэрсэн техникээ зам дээр, талд хаяж орхин, Оросын офицеруудын эхнэрүүд өглөөнөөс эхлээд л дэлгүүрийг хоосолж байдаг байлаа. Эцэст нь оросууд явснаар найрамдал гэдэг ор тас мартагдсан даа” гэж энэ нийтлэлд тэмдэглэжээ. Нэвтрүүлэг бэлтгэсэн сэтгүүлчдийнхээр Зүүн Германы иргэд одоо л Оростой харилцаагаа сайжруулахыг эрмэлздэг болж байгаа гэнэ.
“Аливаа нэгэнд, тухайлбал дайн самуун, сонгууль гэхэд Зүүн Германы иргэд барууныхнаас өөрөөр ханддаг. Энэ нь тэдний түүхтэй холбоотой” гэж Галле-Виттенбергийн Их сургуулийн профессор нэн шинэ түүхч Зильке Сатюковын үгийг телевиз эш татжээ.
1970-1980-аад онд Зөвлөлтийн цэргийн бүлэглэл Германд хамгийн хүчирхэг, Зөвлөлтийн армийн стратеги, шуурхай хүчний хамгийн чадварлаг хэсэг байсан. Энэ нь Варшавын гэрээний оролцогч орнуудын нэгдсэн зэвсэгт хүчний ажиллагаанд гол үүрэг гүйцэтгэдэг байлаа. Бүгд найрамдах ардчилсан Герман улс, Холбооны бүгд найрамдах Герман улс, Их Британи, Зөвлөлт холбоот улс, Франц улс 1990 есдүгээр сарын 12-нд “Германы харилцааг тогтворжуулах эцсийн гэрээ”-нд гарын үсэг зурснаар Зөвлөлтийн бүх цэргийг тус улсаас 1994 оны эцэс гэхэд бүрэн гаргаж дуусах талаар тохиролцсон. Зөвлөлт холбоот улс, Холбооны бүгд найрамдах Герман улс мөн 1990 оны аравдугаар сарын 12-нд гэрээ байгуулж Зөвлөлтийн цэргийг 1990 оны сүүлчээс эхлэн гаргаж, 1994 он гэхэд дуусгахаар тогтсон байна.
Герман улс ч Зөвлөлтийн цэргийг өөрийн улсаас гарахад дэмжлэг болгож 1991-1994 онд 12 тэрбум марк хуваарилснаас найман тэрбум маркийг Зөвлөлтийн цэргийн офицеруудад орон сууц барихад зориулан гаргаж байжээ. Энэ гурван жилд Германаас Зөвлөлтийн зургаан арми, 49 бригад, 42 тусгай хороо, мото буудлага, танкийн тус бүр найм, артиллерийн нэг, нисэхийн тав нийт 22 дивиз эх орондоо буцсан.

ЭХ СУРВАЛЖ: "АРДЧИЛАЛ ТАЙМС" СОНИН