Прагад байгаад саяхан буулгасан Зөвлөлт холбоот улсын маршал Иван Коневын хөшөөг Орост эргүүлэн өгөх боломжгүй гэж Чехийн Батлан хамгаалах яам мэдэгдсэн байна. Уг хөшөө Батлан хамгаалах яамны мэдлийнх биш, харин Прага-6 дүүргийн мэдлийнх учраас ийн шилжүүлж чадахгүй гэж энэ мэдээлэлд дурджээ. “Энэ хөшөө Батлан хамгаалах яамны өмч биш, манай нутаг дэвсгэрт ч байгаагүй. Нөгөө талаар эрх зүйн талаас авч үзвэл түүнийг цэргийн оршуулга гэж үзэж болохгүй. Хөшөө буулгах шийдвэрийг Батлан хамгаалах яам биш, хотын Прага-6 дүүрэг гаргасан болохоор хуулийн үүднээс авч үзвэл тус дүүргийн өмчид халдах эрх бидэнд байхгүй. Тэгэхээр түүнийг ОХУ-д эргүүлэн өгөх шийдвэр гаргах эрх бидэнд байхгүй” гэж Чехийн Батлан хамгаалахын сайд Лубомир Метнар ОХУ-ын Батлан хамгаалахын сайд Сергей Шойгуд явуулсан захидалдаа дурдсан байна.
Прагад байсан маршал И.Коневын хөшөөг дүүргийн эрх баригчдын шийдвэрээр тавдугаар сарын 3-нд буулгасан. Энэ явдал Оросын эрх баригчид, олон нийтийн эсэргүүцэлтэй тулгарсан ч НАТО-гийн ерөнхий нарийн бичгийн дарга Йенс Столтенберг хүмүүс өөрсдөө л зөв гэж үзэж байвал өөрсдөө ямар ч шийдвэр гаргах эрхтэй гэж саналаа илэрхийлсэн. Хөшөө буулгасны дараа Оросын дипломат паспорттой иргэн рицин хэмээх хорт бодистой чемодан авч Чехийн нийслэлд ирлээ, тэр хөшөө буулгах шийдвэр гаргасан хүмүүсийг хордуулах гэж байна гэсэн дуулиан бас дэгдсэн.

ЭХ СУРВАЛЖ: "АРДЧИЛАЛ ТАЙМС" СОНИН