Америкийн цэргийн шинэ салаа Польшийн нутагт зургаан газар байрлана, энэ бол тус бүгд найрамдах улсад хэн нэгэн халдах юм бол НАТО руу халдаж байна гэсэн үг хэмээн Варшав итгэж байна. “Польшийн радио”-гийн мэдээлснээр бол Варшав НАТО, Америкийн цэргүүдийг Польшийн зүүн нутагт Беларусын хил дагуу байрлуулна гэж Польшийн Батлан хамгаалахын сайд Мариш Блащак мэдэгджээ.

“Болзошгүй түрэмгийллээс сэргийлэхийн тулд НАТО-гийн зүүн жигүүр, мэдээж манай улсын зүүн жигүүрийг бэхжүүлэх нь чухал байна. Байж болох түрэмгийлэгч ч гэсэн Польшийн хилийг зөрчих нь зүгээр нэг мөргөлдөөн биш, дэлхий дахины асуудал гэдгийг мэдэж байгаа. Польшид довтлох нь бүхий л НАТО руу дайрч байгаа хэрэг гэдгийг Америкийн цэргийнхэн ч мэдэж байгаа” гэж Блащак хэлсэн байна.

Польшийн сайд бас Польш улс НАТО-гийн зүүн жигүүр дэх Америкийн бүх цэргийг захирах дивизионы командлал байгуулж байгаагаа тэмдэглэжээ.
Польшийн сайдын энэ мэдэгдлийн дараа ОХУ-ын Холбооны зөвлөлийн Олон улсын асуудлаарх хорооны нэгдүгээр орлогч Владимир Жабаров бас “Үнэхээр ийм бол Орос ч гэсэн хариу арга хэмжээ авч баруун хил дээрх цэргээ бэхжүүлнэ” гэсэн байна.

“Польшид юу болж байгааг ойлгохгүй байна. Магадгүй тэд хэн нэгний цэргийн бааз байхыг хүсч байгаа бололтой” гэж сенатч хэлээд аюулгүй байдлын үүднээс харвал АНУ-ын цэрэг Польшид байгаад юу ч өгөхгүй гэсэн байна.

Америкийн цэргийн баазыг нутагтаа байрлуулах саналаа “Оросын аюултай байр суурь бэхжиж байгаа учраас” хэмээн Варшав өөрөө өнгөрсөн оны хавраас эхлэн гаргаж ирсэн юм. Тэд үүний тулд НАТО-д хоёр тэрбум ам.доллар гаргахаа бас мэдэгдсэн.
Өнөөдөр Польшид Америкийн 4.5 мянга орчим цэрэг байгаагийн бүрэлдэхүүнд хуягт танкийн бригад, олон үндэсний батальоны хэсэг байгаа юм. Эндэх цэргийнхээ тоог нэмэгдүүлэх талаар хоёр орон өнгөрсөн дөрөвдүгээр сарын сүүлчээр харилцан тохиролцсон. Польшийн хөрш Германд Америкийн 30 гаруй мянган цэрэг байнга байрладаг юм.