Израиль улс Палестины газраас өөртөө нэгтгэх гэж байгаа учраас тус улс Израиль, АНУ-тай хийсэн бүх хэлэлцээрээс гарлаа гэж Палестины Ерөнхийлөгч Махмуд Аббас “Аль-Жазира” телевизээр ярихдаа мэдэгдсэн байна. “Палестин улс, Палестины чөлөөлөх байгууллага өнөөдрөөс эхлэн АНУ, Израилийн засгийн газартай байгуулсан бүх хэлэлцээр, ялангуяа аюулгүй байдлын хэлэлцээрийг биелүүлэхээс татгалзаж байна” гэж Махмуд Аббас мэдэгджээ. М.Аббас бас “Палестины газар нутгийг эзэлж, түрэмгий хүч хэрэглэж байгаа”-гийнхаа төлөө дэлхий дахины өмнө хариуцлага хүлээхийг Израилийн Засгийн газарт уриалсан байна. Эцэст нь Махмуд Аббас “Олон улсын эрх зүйг хүлээн зөвшөөрч олон улсын энхийн бага хуралд оролцон” Палестин-Израилийн сөргөлдөөний асуудлаарх хэлэлцээрт Палестин эргэн ороход бэлэн байна гэдгээ мэдэгджээ.