Хятадын Huawei компани АНУ-ын хязгаарлалтаас болоод бүтээгдэхүүн үйлдвэрлэлийн хэмжээгээ бууруулснаар ойрын хоёр жилд 30 тэрбум ам.долларын алдагдал хүлээж магадгүй байна гэж тус компанийг үндэслэгч, ерөнхий захирал Жэнь Жэнфэй Хятадын төв телевизээр ярихдаа мэдээлжээ. “Ийм байдлаар худалдаанаас олох орлого дараа онд 100 орчим тэрбум ам.доллар болохоор байна” гэж Жэнь Жэнфэй хэлсэн байна. Худалдааны ийм дайн, хязгаарлалтын арга хэмжээ зөвхөн Хятадын бизнест төдийгүй, АНУ-ын эрх ашигт ч хохирол учруулж байна гэж тэр онцолжээ. Өөрийнх нь компанийн бизнес 2020 оны дараа сэргэнэ гэдэгт итгэж байгаагаа тэр бас хэлсэн байна.

2018 онд Huawei 721.2 тэрбум юанийн орлого олж байсан нь өмнөх 2017 оныхоосоо 19.5 хувиар илүү байсан юм. Харин АНУ өнгөрсөн тавдугаар сард Huawei компанийг Бээжингийн талд ашигтай тагнуул хийсэн, Америкийн компанийн оюуны өмчийг хулгайлсан хэмээн буруутгасан юм. АНУ-ын Ерөнхийлөгч Дональд Трамп мэдээллийн дэд бүтцийн аюулгүй байдлыг хангахын тулд онц байдал зарлаж Huawei компанийн хувьд Америкийн зах зээлийг үндсэнд нь хаасан юм.

Huawei компанийг Америкийн Сангийн яам хар жагсаалтад оруулан тусгай зөвшөөрөлгүйгээр Америкийн компаниуд арилжаа хийхийг хориглосон юм. Үүний зэрэгцээ Huawei компанийн тоног төхөөрөмж ашиглахаас татгалзахыг Европын орнуудад итгүүлэхийг Вашингтон оролдож байгаа юм. АНУ-ын Ерөнхийлөгч Дональд Трамп Их Британид айлчах үеэрээ ингээгүй тохиолдолд тагнуулын мэдээлэл солилцохоо хязгаарлана гэж хэлж байсан. Оросын Санкт-Петербургт болсон Петербургийн олон улсын эдийн засгийн форумын үеэр ОХУ-ын Ерөнхийлөгч Владимир Путин Huawei компанийн эсрэг АНУ-ын тавьсан хязгаар хоригийг “Дэлхийн зах зээлээс хасах гэсэн оролдлого, магадгүй технологийн анхны дайн ч байж мэднэ” гэсэн юм.