Бээжин Үндэсний аюулгүй байдлын тухай хууль гэдгээр далайлган Хонконгийг “эзлэх” гэж байгаа бол Вашингтон Хятадын эсрэг хориг тавьж магадгүй гэж АНУ-ын Ерөнхийлөгчийн зөвлөх Роберт О’Брайен NBC телевизэд ярилцлага өгөх үеэрээ мэдэгдсэн байна. БНХАУ-ын Коммунист нам 1984 онд Их Британитай хамтран гаргасан тунхаглалдаа Хонконгийг 2047 он хүртэл автономит байдлаа, амьдралын хэвшлээ хадгална гэж амласныг нь Роберт О’Брайен сануулжээ. “Тунхагт заасан хугацаа дуусахад 27 жил дутуу байхад Үндэсний аюулгүй байдлын тухай хууль гэдгээр далимдуулан тэд үндсэндээ Хонконгийг эзлэх гэж байна. Тэд үнэхээр үүнийгээ хийх юм бол хүний эрхийн тухай болон Хонконгийн ардчиллын тухай, Хонконг автономио сахин хадгална гэсэн 1992, 2019 оны хуулиудыг Төрийн нарийн бичгийн дарга М.Помпео баталгаажуулж чадахгүйд хүрнэ” гэж АНУ-ын Ерөнхийлөгчийн зөвлөх хэлсэн байна. О’Брайен бас “Хятад улс Хонконгийг эзэлчих юм бол Хонконг Азийн санхүүгийн төв байхаа болино” гэжээ.
Бүх Хятадын Ардын төлөөлөгчдийн их хурлын чуулганаар хэлэлцэх гэж байгаа Хонконгийн Үндэсний аюулгүй байдлын тухай хуулийг Хонконгийн засаг захиргааны тэргүүн Кэрри Лэм хатагтай дэмжиж байгаа. АНУ-ын Төрийн нарийн бичгийн дарга Майк Помпео үүний өмнө Хонконгийн автономи, эрх чөлөөг боомилох БНХАУ-ын ямар ч шийдвэрийн эсрэг Вашингтон Хятадын “Нэг улс, хоёр систем” гэсэн зарчмыг эргэн харахад хүргэнэ. Бүх Хятадын Ардын төлөөлөгчдийн хурал Хонконгийн үндэсний аюулгүй байдлын тухай хууль хэлэлцэж байгааг АНУ анхааралтай ажиглаж, хэлэлцэж байна. Энэ бол хууль зүйн эрх тогтоох үйл явцаас ухарч, иргэдийн хүсэл зоригийн эсрэг чиглэж байна гэж М.Помпео онцлон тэмдэглэжээ.
БНХАУ-ын эрх баригчдын Хонконгод тусгайлан зориулж боловсруулсан үндэсний аюулгүй байдлын тухай хуулийн төслөөр бол салан тусгаарлах гэсэн аливаа үйл ажиллагаа, төв Засгийн газрыг унагаах гэсэн ямар нэг оролдлого, хөндлөнгийн оролцоо зэргийг хориглож байгаа юм хэмээн South China Morning Post хэвлэл мэдээлжээ.
Хэвлэлд бичсэнээр үндэсний аюулгүй байдлын болон тус районы улс төрийн нөхцөл байдлын талаар Хонконгийн хууль тогтоох байгууллага ямар ч хууль гаргах эрхгүй болж энэ талаарх бүхий л эрх мэдлийг зөвхөн Бүх Хятадын Ардын төлөөлөгчдийн их хуралд шилжүүлж байгаа юм байна.

Аюулгүй байдлын тухай хуулийг Хонконгийн гарнизон дэмжиж байна

Бүх Хятадын Ардын төлөөлөгчдийн их хурлын чуулганаар хэлэлцэж байгаа Хонконгод үндэсний аюулгүй байдлыг хангах тухай хуулийн төслийг Хонконгт байрлаж байгаа Хятадын цэргийнхэн бүрэн дэмжиж байна гэж Хонконгийн гарнизоны командлагч Бүх Хятадын Ардын төлөөлөгчдийн их хурлын депутат Чэнь Даосян мэдээлсэн байна. Түүнийхээр тус гарнизоны бие бүрэлдэхүүн офицер, цэрэг дайчид Хонконгийн тогтвортой байдлыг хангах, удаан хугацаагаар цэцэглэн хөгжихөд, мөн үндэсний аюулгүй байдал, тусгаар тогтнолыг хамгаалахад бэлэн байгаагаа илэрхийлж байгаа гэнэ.
Хонконгт “Үндэсний аюулгүй байдлыг хангахын тулд авах арга хэмжээний механизм” гэсэн хуулийн төслийг хэлэлцэхээр төлөвлөж байгаагаа Хятадын эрх баригчид өнгөрсөн долоо хоногт зарласан. Хуулийн төслийг Бүх Хятадын Ардын төлөөлөгчдийн их хурлын чуулган дуусахын өмнө тавдугаар сарын 28-нд хэлэлцэж батлах юм байна.

ЭХ СУРВАЛЖ: "АРДЧИЛАЛ ТАЙМС" СОНИН