“Оросын Ерөнхийлөгч Владимир Путин надтай сайн харилцаатай, гэхдээ ирэх намар болох Ерөнхийлөгчийн сонгуульд өөрийг нь ялаасай гэж хүсэхгүй байгаа” хэмээн АНУ-ын Ерөнхийлөгч Дональд Трамп үзэж байна. “Би Орост тохиосон хамгийн муу зүйл гэдгийг В.Путин сайн ойлгож байгаа. В.Путин бид хоёр зэрэгцээд байж байгаа ч тэр намайг Ерөнхийлөгчийн сонгуульд ялаасай гэж хүсэхгүй байгаа” хэмээн Д.Трамп сэтгүүлч Шерил Аткиссонд өнгөрсөн ням гарагт өгсөн ярилцлагадаа онцолжээ. “Уг нь тэр надтай сайн харилцаатай, гэхдээ л намайг ялуулахыг хүсэхгүй байгаа гэдэгт би итгэлтэй байна” гэж Д.Трамп хэлжээ. “Хятад бас намайг ялаасай гэж хүсэхгүй байгаа” гэж Америкийн тэргүүн нэмж хэлсэн байна.
2016 онд болсон Америкийн Ерөнхийлөгчийн сонгуульд Орос хөндлөнгөөс оролцсон гэж АНУ-ын тусгай алба Оросыг буруутгадаг. Үнэхээр Америкийн тэргүүний сонгуульд оросууд хөндлөнгөөс оролцож нөлөөлсөн эсэхийг АНУ-ын тусгай прокурор Роберт Мюллер хоёр жилийн турш мөрдөн шалгасан. Гэхдээ Дональд Трампын сонгуулийн штаб, бүгд найрамдахчууд, Оросын эрх баригчидтай ямар нэг яриа хэлэлцээр хийсэн эсэхийг шалгасан юм.
Эцэст нь Роберт Мюллер энэ талаар ямар нэгэн яриа хэлэлцээ байгаагүй гэсэн дүгнэлт гаргаж тайлагнасан юм. АНУ-ын Ерөнхийлөгч Дональд Трамп ч сонгуулийн кампанийнхаа үеэр Оросын албаны хүмүүстэй ямар нэг хууль бус харилцаа холбоо байгаагүй гэж нэг бус удаа мэдэгдэж байсан. Москва ч бас АНУ-ын Ерөнхийлөгчийн сонгуулийн үеэр нөлөөлөх ямар нэг үйлдэл хийгээгүй гэж олон удаа мэдэгдэж өөрсдийгөө зөвтгөсөн.

ЭХ СУРВАЛЖ: "АРДЧИЛАЛ ТАЙМС" СОНИН