Хятадаас эхлэлтэй коронавирусийн цар тахлын үеэр Швед хатуу хөл хорио тогтоохгүй байгаа ч эдийн засгийн хүчтэй уналт, ажилгүйдлийн түвшин өсөх аюул тус улсад нүүрлэж байна гэж “Bloomberg” агентлаг мэдээллээ. Үүнээс үүдээд эдийн засагт хүчтэй хямрал нүүрлэж мэднэ гэж эдийн засагчид үзэж байна. Ажилгүйдлийн түвшин гэхэд л өнгөрөгч дөрөвдүгээр сард 7.9 хувиар өссөн нь өмнө нь урьдчилан тооцоолж байснаас өндөр байна. Ялангуяа аялал жуулчлал, зоогийн газрын үйлчилгээний нөхцөл байдал ажилгүйдлийн түвшинд илүүтэй нөлөөлсөн гэж мэргэжилтнүүд хэлж байна. Хэвлэлийн тоймч Йоханны Йенссоныхоор бол тус улсын ажилгүйдэл цаашид ч улам нэмэгдэж 17 хувьд хүрч мэднэ гэнэ.
Байдал ийм байхад эрх баригчид ажлын байрыг цомхотгох шинэ хуулийн төсөл боловсруулах ажлаа үргэлжлүүлсээр байна. Энэ нь сөрөг хүчин болон үйлдвэрчний эвлэлийнхний эсэргүүцэлтэй тулж байгаа юм. Сөрөг хүчнийхэн бүр Ерөнхий сайд Стефан Левенуд итгэл үзүүлэх эсэх асуудал босгож байна. Өнөөдрийн байдлаар Шведэд коронавирусийн халдварын 34 мянган тохиолдол бүртгэгдэж дөрвөн мянга орчим хүн нас бараад байгаа юм.

ЭХ СУРВАЛЖ: "АРДЧИЛАЛ ТАЙМС" СОНИН